Tabashada ugu badan ee laga qabo madaxweyne Muuse Biixi iyo xukuumadiisa ayaa ah dhinaca saami qaybsiga oo saluug weyn laga muujiyey, taas oo keentay in shacabku ku qaybsamo isla markaana ilaa maanta aanay isku aragti ka ahayn bulshadu.

Hadaba tabashadii ay bulshadu ka qabtay madaxweyne Muuse Biixi iyo xukuumadiisa ayaa meesha ka baxay tan iyo markii ay dawlada soomaaliya ku dhawaaqday inay xidhiidhka u jartay dalka Guinea Conakry oo martiqaad u fidiyey madaxweynaha somaliland.

Dhawaaqa dawlada soomaaliya ayaa keenay inay midoobaan shacabka somaliland isla markaana ay maalmo kooban meesha ka baxdo kala qaybsanaantii iyo aragtiyihii kala duwanaa ee laga qabay madaxweyne Muuse Iyo Xukuumadiisa dheeligu ka muuqdo.

Isku duubnida iyo midaynta ka muuqatay shacabka somaliland maalmihii ugu dambeeyey ayaan ahayn mid uu keenay madaxweyne Muuse Biixi, balse waxay salka ku haysay go’aanka ay dawlada federaalka ah ee soomaaliya xidhiidhka ugu jartay dalka Guinea oo cilaaqaad cusub la samaystay somaliland, talaabadaas oo shacabka somaliland u arkeen isla markaana ugu midoobeen inay tahay mid muujinaysa cadaawada ay dawlada soomaaliya u hayso.

Midnimada ay muujiyeen shacabka somaliland ayaa keentay in soo dhawayn balaadhan oo wadajir ah lagu qaabilo madaxweyne Muuse Biixi iyo weftigiisii ka soo laabtay dalka Guinea, iyada oo shacabka caasimaduna ay madaxweynaha u muujiyeen soo dhawayn aanay u kala hadhin. 

Hadaba waxa lays waydiinayaa madaxweyne Muuse Biixi maka faa,iidaysan doonaa isku duubnida ka muuqata shacabka somaliland isla markaana ma xalin doonaa tabashada laga qabo xukuumadiisa, inkasta oo madaxweyne Muuse lagu tilmaansado inuu yahay hogaamiye aan aqoon tanaasulka isla markaana aan qaadan talooyinka loo soo jeediyo.

Haatana guud ahaan shacabka, siyaasiyiinta iyo waxgaradka somaliland ayaa isha ku haya ficilada madaxweyne Muuse Biixi inay noqdaan kuwo uu kaga faa,iidaysto isku duubnida shacabka iyo inuu halkiisii ka sii anba qaado go’aamadii dhinaca kaliya farxad galin jiray ee uu caanka ku ahaa mudadii uu talada dalka hayey.

Hadhwanaagnews.com/Office

Hargeysa/Somaliland