Sheeko xikmad leh

Warsame iyo Weris waxay ahaayeen aroos cusub , waxaanay soo degeen gurigoodii cusbaa .

Waxay jaar la noqdeen qoys yar .

Hadaba maalin maalmaha ka mid ah ayaa Warsame iyo Weris oo quraacanaaya ,

ayaa Weris waxay daaqadda ka aragtay gabadhii jaarkooda ahayd oo maryo wadhanaysa ,

markaasay inta ay Weris sare u qaylisay tidhi :

Bal eeg warsamaw naagtan maryaha uskaga leh wadhaysa ,

miyaanay garanayn sida maryaha loo nadiifiyo , waxay ahayd in ay saabuun fiican oo uskaga maryaha ka jarta ku maydho .

Saygeedii Warsame intuu eegay oo la yaabay buu iska aamusay .

Markasta oo ay gabadha jaarkooda ahi maryo wadhanayso , hadaladii bay ku soo celcelisaa .

Bil kadib ayaa waxay aragtay gabadhii oo maryaheedii wadhanaysa oo ay aad u nadiif yihiin una dhalaalayaan ,

markaasaa ay saygeedii Warsame ku tidhi :

Bal eeg warsamaw gabadhii jaarkeenna ahayd , way baratay sida maryaha loo maydho ee loo nadiifiyo , tolow yaa baray ee wax u sheegay ?

Warsame wuxuu xaaskiisii ugu jawaabay :

Saaka goor hore ayaan kacay oo daaqadda iyo muraayadaheenaba waan nadiifiyay .

Hadaba gabadhu maryaha ay wadhi jirtay nadiif bay ahayeene ,

ee muraayadda daaqadda guriga Warsame iyo Weris ayaa uskag lahayd (ahayd) .

Hadaba ujeedada sheekadani waxay tahay , inta aanad dadka kale dhaliilin ee aanad wax ka sheegin , bal wax hubso ama intaanad dadka kale xukumin bal horta runta ogow , ama wax u fiirso intaanad iska hadlin .

Waxaana jira waxyaabo badan oo aan ahayn sida aad u aragto ,

ama aad u malaynayso ,

ama aad u maqashay ,

ee had iyo jeer dhaliisha aanad hubin ha ku degdegin .

Muraayad uskag lehna wax haku eegin .

Cali Biixi