Hargaysa (HWN) Yuusuf Garaad ayaa  ka hadlay xadhig ay xukuumada Somaliland ugaysatay saxafiyiin ka tirsan MM-TV oo xalay Hargaysa lagu xidhay, xili ay wadeen dood ku saabsan heshiiska is-afgarad ee ay wada gaadheen Somaliland iyo Itoobiya.

Yuusuf ayaa qoraal uu baahiyay oo uu kaga hadlayo xadhiga saxafiyiintan ku yidhi sidan.

 "Dood lagu falanqeynayo faa’iido iyo halis waxa ku jiri kara heshiiska Somaliland iyo Ethiopia oo dhowr kun oo ruux ay soo galeen khadka ayaa xalay waxaa twitter Spaces ku marti geliyay MMTv, oo xaruntiisu ay tahay Hargeysa.

Maxamed Ilig oo ah milkiilaha MMTv iyo Cabdishakuur Dayib oo ah Agaasimaha ayaa hadalka u qeybginayay Mas’uul Sarę oo Somaliland ah, Faysal Cali Sheekh oo Hargeysa la jooga iyo aniga oo Xamar jooga. Waxaa khadka ku jiray laba kun iyo dhowr boqol oo Soomaali ah.

Mar keliya ayay hawada ka baxday.

Maanta waxaan maqlayaa in Booliisku doodda oo socota ay u dheceen xarunta TV-ga, xabsigana ay u taxaabeen Mikiilaha Tv-ga Maxamed Ilig iyo hawadeennada kala ah Ilyaas Cabdinaasir iyo Maxamed Cabdi Cabdillaahi (Andar).

Aad ayaan uga xumahay xarigga saddexdaa dhallinyarada ah.

Dooddu waxay ahayd mid kulul, markii loo fasaxay dadweynuhu in ay su’aalo na weydiiyana, laba rac oo su’aalo ah, hal su’aal marka laga reebo aniga ayay igu socdeen ama si kale haddii aan u dhigo waxay u xaglinayeen mowqifka Dowladda Somaliland.

Waxaan is leeyahay mas’uul Somaliland ah oo xasil u dhegeystay doodda oo inteeda badan la sii daayay in aanuu go’aan ku qaateen in uu dhowr kun oo dunida dacalladeeda jooga oo khadka ku wada jira uu markhaati uga dhigo xarigga saddexda.

Waxaan ka codsanayaa Madaxda amarkeeda leh in ay xabsiga ka sii daayaan weriyayaasha.”