Spain waa waddanka ugu badan ee soo saara saliid saytuunka, waxaana uu oo soo saaraa boqolkiiba 70 saliid saytuunka laga isticmaalo Yurub.

Sidoo kale Spain waxaa ay soo saartaa 45 % saliid saytuunka oo adduunka laga isticmaalo.

Roob la’aanta ka jirta gobolada kala duwan ee dalka Spain ee laga beero saliid saytuunka ayaa si weyn uga qayb qaatay hoos u dhaca ku yimid wax soo saarka saliid ee guud ahaan dalka, taasoo keentay in qiimiheedu uu sare u kaco.

Qiimaha saliidda saytuunka ayaa kor u kacday boqolkiiba 70 sanadkan oo keliya guud ahaan dalkaasi, waxaana sidoo kale uu sare u kacay sanadkii hore 2022.

Halkii dhalo oo saliid saytuun ah ayaa hadda lagu iibiyaa ku dhawaad $9.88 dukaamada waaweyn.

"Runtii labadii sano ee lasoo dhaafay ma ahyen kuwa noo wanaagsan, abaaro isdaba joog ah ayaa jiray wax soo saarkuna waxaa uu ahaa mid aad u hooseeyay,” ayuu yir Francisco José ka tirsan beerlayda saytuunka ee dalka Spain .

Beerta Francisco José ayaa ku taalla gobolka koonfureed ee dalka Spain ayaa ah meelaha ugu wax soo saarka badan saldiin saytuunka.

"Haddii wax soo saarka gudah dalka Spain uu hoos u dhaco waa in sidoo kale dalabka iyo dhoofka dalalka kale uu hoos u dhacaa qiimuhuna kor u kacaa, taas waa qaanuunka suuqa," ayuu hadalkiisa sii raaciyay.

Nuestra Señora del Pilar, oo ah shirkadda ugu weyn adduunka oo dhan ee ka shaqeysa farsameynta saliid saytuunka ayaa sidoo kale uu hoos u dhacay dhaqaalaheeda.

Sanadkaan shirkaddu waxaa ay soo saartay 24 milyan oo kiilo oo saliid ah, waana tiradii ugu yarayd abid ee shirkaddu ay soo saarto taariikhda.

Madaxa shirkadda Cristobal Gallego Martínez, ayaa sheegay in sare u kac ku yimid qiimaha shidaalka iyo daawada bacriminta uu sababay hoos u dhac ku yimid wax soo saarka saliid saytuunka ee guud ahaan aduunka oo dhan.

"Waxaan wajahaynaa dhibaatooyin ay ka mid yihiin isbeddelka cimilada, abaaro soo laa laabtay waxaana dhacda mararka qaar in aan wayno biyo aan beeraha ku waraabin” ayuu yir Cristobal Gallego Martínez.

Waxaa uu sheegay in dhibaatada abaaraha iyo fatahaadaha ay noqdeen kuwo halis ku ah beeraleyda dalka, isaga oo xusay in ay muhiim tahay in dowladdu ay qaaddo tallaabooyin lagu xallinayo arrinta.

Sare u kaca ku yimid qiimaha saliid saytuunka ee Spain ayaa saameeyay Yurub inteeda kale.

Laakiin waddamada qaar qiimuhu wax badan ma kordhin sidii xilligii hore uu ahaan jiray, waxaana dalalka qaar ay bilaabeen in ay kasoo iibsadaan dalal kale oo ay k mid yihiin dalka Portugal halkaas oo qiimuhu uu ka jaban yahay.

Qiimaha saliidda saytuunka ee Ingiriiska iyo Ireland ma ahan mid u sarreeya sida Spain oo kale, in kasta oo ay kasoo dhoofsadaan Spain, waxaana dalalka ay u kaydsadeen saliidda in uu sare u kac ku imaan qiimaha lagu kala iibsado.

Lixdan iyo shan boqolkiiba saliidda saytuunka ee Spain ay soo saarto ayaa lagu iibiyaa dibadda, inkastoo sanadkan ay tiradu aad hoos ugu dhacday.

Faa’iidooyinka caafimaad ee laga helo saliid saytuunka

Saliid seytuunka waa cuntada ugu wanaagsan ee laga isticmaalo waddamada ku teedsan badda Medhitiraaniyanka, sidoo kale meelaha aadka looga isticmaalo waxaa ka mid ah Soomaaliya.

Daraasado fara badan oo la sameeyey waxay tibaaxayaan saliid seytuunka asalka ah iney faa’iidooyin caafimaadka leedahay.

Waxaana faa’iidooyinkaasi ka mid ah inay dajiso dhiig karka iyo iney nidaamiso dufanka jirka ku jira.

Cimibaarisyo Sayniska oo la sameeyey waxay sheegayaan saliid saytuunka iney tahay halka keli ah ee laga helo dufanka aan fariisan, kaasoo yareeyo dhiig furanka iyo cudurrada wadnaha ku dhaca.

"Saliid saytuunku waa waxa ugu wanaagsan ee ay dadku cuni karaan si difaac jirkiisa uu ahaado mid adag,waxaana lagu daaweyn karaa cudurrada wadnaha," waxaan sidaas sheegay Fernando López-Segura oo ka tirsan Isbitaalka Reina Sofia ee dalka Spain.