Hargaysa (HWN) Gudoomiyaha Guud ee Dallada SONSAF Anwar Cabdiraxmaan Warsame ayaa ka hadlay laba dhalinyaro ah oo ku geeriyooday bada Berbera.

Gudoomiye Anwar ayaa usoo jeediyay maamulka Degmada Berbera inay xil iska saaraan ilaalinta bada, sida uu ku sheegay gudoomiyuhu qoraalkan hoose oo uu baahiyay.

"Maalintii Shalay ahayd waxa Badda Berbera ku geeriyooday laba dhalinyaro ah oo meydkoodii ilaa hadda la waayay, runtii waa geeri naxdin leh oo ay sababtay badda Berbera oo ay ku dhinteen dhalinyaro tiro badan oo ka kala yimi gobolada dalka.

Waxa aan ugu baaqayaa dhalinyaradu in ay ka feejignaadaan, islamarkaana aanay khatar galin naftood iyagoo aan aqoon u lahayn xirfad ama dabaal ay kaga badbaadikaraan badda.

Markale waxa aan ugu baaqayaa maamulka degmada bebrbera in ay dedaal dheerad ah ku bixiyaan adeegyada badbaadada badaha iyo maaraynta marka ay dhacaan masiibooyinka noocan oo kale ah.

 Sidoo kalena taxadar badan la sameeyo xiliyadda ay jiraan  roobabka badani.” Ayuu qoraalkiisa ku yidhi Gudoomiye Anwar.

Maaha markii ugu horaysay ee Bada Berberi ay liqdo dhalinyaro, balse dhalinyaro badan ayaa ku nafwaayay biyaha Bada Berbera.