Maxaad ku xusuusataa markaad subag maqasho? Canjeero kulul amaba oodkac lagu sameeyay subag.

Subaggu mar buu Soomaalidu u ahaa cunno aysan ka maarmin oo waxyaabo badan iidaan looga dhigo, hase yeeshee muddooyinkii dambe waxyaabo badan ayaa beddelay sida saliid-caddeyda amaba macsarada iyo noocyo kale sida tan saytuunka.

Inkastoo subagga kan lo’da iyo arigaba laga isticmaalo meelo badan oo Soomaaliya ah, sidoo kalena qaaradda Aasiya sida Hindiya, haddana waxaa soo baxayay in haddii la iska badiyo uu dhibaato u leeyahay caafimaadka. Sababta ayaa ah in subagga uu leeyahay dux aad u badan.

Subagga waa waxa ugu saafisan ee laga soo saaro xoolaha, haddii ay ahaan lahayd lo’da amaba ariga.

Isticmaalka Soomaalida ee subagga xoolaha

Subagga xoolaha waqti hore ilaa hada wuxuu ahaa mid isticmaalkiisu ku badan yahay dhulka soomaalida gaar ahaan miyiga oo uu ahaa iidaanka cunada kan labaad ee loogu isticmaalka badan yahay marka laga soo tago caanaha xoolaha.

Marka marti soo hoyaati timaaddo wuxuu subaggu ahaa mid loogu iidaamo cunada lagu marti soorayo sida bariiska cad,digirta ama wax burka laga sameeyo.

Subagga loogu isticmaalka badan yahay dhulka Soomaalida waxaa laga soo saaraa caanaha ariga iyo lo’da inkastoo abaaraha saameeyey deeganada uu yaraaday helitaankiisa.

Subaga ayaa u kala baxa laba nooc oo kala isticmaala mid sixin ah oo waxba lagu darin iyo mid saliid lagu barxo si mudo loo sii isticmaalo.

Faa’iidooyinka laga helo subagga

Maryan Ciise Cumar oo bare ka ah jaamacadda Badda Cas ee Boosaaso oo ku takhasustay nafaqeynta iyo quudinta, ayaa BBC-da u sheegtay in subaggu leeyahay faa'iidooyin dhowr ah iyo sidoo kalena uu u darnaan karo caafimaadka.

Nafaqada ku jirta subagga

Halkii qaaddo oo subag ah waxaa ku jirta:

Kalori: 130

Borotiin: 0 garaam

Dufan: 15 garaam

Karbohydaraat: 0 garaam

Fiber: 0 garaam

Sokor: 0 garaam

Sida ay muujiyeen daraasado laga sameeyey sida uu subaggu ugu fiican yahay jirka bini’aadanka ayaa muujinaysa in maaddooyin muhiim u ah caafimaadku ay ku jiraan subagga kuwaas oo qaybtood ka hortaga cudurro halis leh.

Subagga waxaa ku jira noocyo kala duwan oo oo fitamiinnada sida A,K,D iyo dufanta noociisa kan wacan iyo kan daran.

Vitamin A ayaa nooc muhiim ah oo jirka ka helo subagga kaas oo ka hortaga cudurro halis ah sida kansarka ku dhaca sambabada iyo qanjirka soo saara shahwada ragga.

Sidoo kale fitamin A ayaa waxa uu sare u qaadaa aragtida oo uu caawiyo indhaha, haddii ay jirka qofka ku yaraadana waxaa hoos u dhici kara aragtida.

Maqaarka ayaa ka mid ah meelaha uu subaggu u fiican yahay maaddaama uu ku jiro dufan badan ku jirto jirkuna u baahan yahay.

Halista caafimaad ee subagga

Subagga waxaa sidoo kale uu leeyahay halis caafimaad oo qofka ku sababi kara cudurro halis leh.

Maaddooyinka ku badan subagga waxaa ka mid ah dufanta nooceeda xun oo jirka ku keenta khatar kalastaroolka ah.

Dufanta badan ee ku jirta subagga ayaa sidoo waxyeello gaarsiin karta xididdada dhiigga ee waraabiya wadnaha kuwaas oo xirma marka xadi ka badano o dufantaas ay gasho.

BBC