Qaar Ka Mid Ah Siyaalaha Ay Faqashta Cusubi Intii Ay Somaliland Haysatay
Qaar ka mid ah
siyaalaha ay Faqashta Cusubi intii ay Soomaalilaand haysatay xoolaha umadda u
dhacday, bulshada u ka la sarraysiisay, una abuurtay dabaqado qaar bakhtiyeen
ama dalka ka qaxeen qaarna hodmeen?
1. U gu horrayn
maaliyadda dalku ku ma shaqayso qorshe dhaqaale oo madaxbannaan oo dhab ah,
miisaaniyadda la dajiyaana u ma baxdo sida marka hore loo soo qoro, ee labada
jeerba wax ay ku shaqaysaa doonista iyo awaamirta Muuse Biixi iyo niman
gacanyarayaal u ga ah, isaga ayaana gacantiisa ku qaybiya oo ku maamula.
2. Mashaariicda
horumarinta dalka degaannada loo ma simo ee aad baa loo gu ka la eexdaa, dadka
mashaariicdaa fuliyana la ga la ma xisaabtamo hawshooda ee marka horeba waa
musuqmaasuq la ga naasnuujiyo.
3. Shaqooyinka dawladda
loo ma bixiyo si daahfuran oo loo siman yahay ee waxaa la siiyaa dad eex iyo
reernimo loo xushay, run ahaantiina waxaa jira reero uu maamulkani si
qorshaysan u beegsaday oo intii uu dalka haystay shaqooyinka iyo xilalkaba ka
xarrimay.
4. Waxaa jira dad iyaga
oo aan shaqayn wasaaradaha ku qoran oo qaata mushahr jiif oo jaq ah, qaarkoodna
dhawr meelood bay ka qaataan is ku mar. Qodobkan iyo kii ka horreyayna wax ay
qayb weyn ka yihii ka la fogaanta dakhliga iyo nolosha qoysaska, ee dhallinyaro
badan oo waxbratay dalka ka barakicisay.
5. Waxaa jira ciidammo
badan oo aan jirin oo wasaaradda gaashaandhigga u qoran kuwaas oo miisaaniyadda
ku jira, mushahar iyo gunnooyin been ahna madaxdu ku qaadato.
6. Awoodda dawladda
waxaa la gu xidhaa shirkado shaqaynaya, dabadeed beddelkooda la furaa kuwo la
mid ah oo is la awooddii dawladda la ga
ga shaqaysto, dad aad u badan baana awood dawladeed oo ay lee yihiin u adeegsada
dano ganacsi.
7. Waxyaalaha dawladdu
soo iibsanayso iyo qandaraasyada ay bixinayso daahfurnaan iyo tartan caddaalad
ah la ma mariyo ee shakhsiyaad loo gu talagalay baa qiimiga ay doonaan la gu
siiyaa, tayadana la ga la ma xisaabtamo.
8. Lacago amaaho iyo
maalgelin la gu sheegay ayaa siyaalo aan sharci ahayn ee naasnuujin iyo musuq
ah ah Bangiga Qaranku dad gaar ah siiyaa.
9. Deeqaha dunidu
Soomaalilaand siiso dadweynaha ayaa la ga sii iibiyaa, sida dawooyinka,
miisaaniyaddana la gu ma daro ee waa la qaataa.
10. Waxaa lacago aan
sharci ahayn la siiyaa odayo dhaqameedyo la gu shaqaysto kuwaas oo bulshada la
gu ka la furfuro, iyo sidoo kale dad baraha bulshada iyo warbaahinta ka caaya
qabiilooyin, xisbiyada iyo shakhsiyaad gaar ah.
11. Waxaa jira lacago
ay quwado shisheeye ujeeddooyin iyo dano ka la duwan Faqashta Cusub u siiyaan,
kuwo qarsoon iyo kuwo la og yahayba, lacagahaasina marnaba ma galaan xisaabaha
dawladda.
12. Waxaa iyaduna aad u
xooggan in aan fursadaha waxbarashada, siiba kuwa debedda, aan marnaba bulshada
iyo degaannada loo simin oo eexasho aad iyo aad u foolxumi jirto.
Waxan joogtoobay ee la
wada og yahay, ee la qaayibay, sheegistooda imika u ga ma dan lihin in aynnu
sidan wax ka ga beddeli karaynno, ama cid la xisaabtantaa soo baxayso, keliya
se waa in ay taariikhda gashaa si mustaqbalka loo gu cibro iyo waaya'aragnimo
qaato.
AFEEF:
Hadhwanaagnews marnaba masuul kama aha Aragtida dadka kale. Qoraaga ayaa xumaanteeda, xushmadeeda iyo xilkeeda sida. waxa kaliya oo Hadhwanaagmedia dhiirigalinaysaa, isdhaafsiga aragtida, canaanta gacaliyo talo wadaagga!