Hargaysa (HWN) Gudiga iskood isku xilqaamay ee xalinta dagaalka u dhexeeya Jabhada Gacan-libaax iyo ciidanka Booliska ayaa kulamo la yeeshay Madaxwayne Biixi, Murashax Cirro iyo Gudoomiye Faysal Cali Waraabe oo ay kala hadleen sida ugu macquulsan ee hawshaa loo dhawayn karo.

Gudiga oo markii hore ka koobnaa 7 xildhibaan ayay ku soo biireen Gudoomiyaha golaha wakiilada Faratoon iyo ku xigeenkiisa 1aad Giire, waxaanay goor dhow la kulmayaan wasiirka Arimaha gudaha oo ay isagana kala hadlayaan xalinta dagaalkan u dhexeeya Jabhada iyo Xukuumada.

Jabhadan ayaa hayb ahaan ka soo jeeda Beesha Garxajis kuwaasi oo sheegay inay ka goodiyeen cadaalad daro ay ka tirsanayaan Xukuumada Muuse Biixi.

Waxaana jira dagaal shalay gelinkii dambe dhex maray jabhada iyo ciidanka RRU-da inkasta oo aan la ogayn khasaaraha dhabta ah ee dagaalkaasi ka dhashay.