Muqdisho(HWN):-Dawlada Soomaaliya ayaa xabsiga dhigtay sarkaal ka tirsan ilaalada madaxweyne Farmaajo.

Sarkaalkan ka tirsan ciidanka ilaalada madaxweyne Farmaajo ayaa habeenkii xalay jidh dil xun u gaysay mid ka mid ah weriyeyaasha ka hawl gala magaalada Muqdisho, wakhti uu doonayey inuu ka mid noqdo warfidiyeenada soo tabinayey xaflad lagu xusay 26 June oo ka socotay xarunta dawlada hoose ee Muqdisho.

Madaxweynaha Farmaajo ayey wararku xaqiijiyeen inuu amray xadhiga sarkaalkan ka tirsan ilaaladiisa ka dib markii uu garawsaday jidh dilka uu u gaystay wariyaha.

Dhinaca kale agaasimaha xafiiska madaxweynaha soomaaliya Cabdi Nuur Maxamed ayaa xaqiijiyey in la xidhay sarkaalkan jidh dilka u gaystay weriyahan isaga oo sheegay in sharciga la horkeeni doono.

Agaasime Cabdi Nuur Maxamed oo ka hadlaya talaabada laga qaaday sarkaalkan jidh dilka u gaystay weriyaha ayaa waxa uu yidhi "Waxaan aad uga xunnahay falkii xalay uu Sarkaal kamid ah CXDS kula kacay suxufi ka tirsan bahdii warbaahinta ee tabinaysay Xuska 26ka Juun, keddib baaritaan ay Ururka 60aad ee Ciidanka Xoogga Dalka ku sameeyeen dhacdadii xalay waxaa falkaas loo soo xiray askarigii kasoo muuqday muuqalladii lagu baahiyay baraha bulshada, waxaana laga qaadi doonaa tallaabo waafaqsan shuruucda Ciidanka Xoogga Dalka,waxaan ku kalsoonnahay in wariyihii dhibka la gaarsiiyay uu helayo caddaalad, waxaana ka raalli galinaynaa shacabka falkii xalay ka dhacay Aqalka Dowladda Hoose”

Baraha Bulshada ayaa si weyn looga hadal hayay muuqaalka sarkaalkan ka tirsanaa Madaxtooyada Soomaaliya ee jirdilka u geestay Wariyaha ka howlgalayay Idaacada ku hadasha Afka maamulka Gobolka Banaadir.