Stephanie Grisham oo horey u aheyd ku-xigeenka afahayeenka xafiiska marwada koobaad ayaa noqoneysaa afahayeen aqalka cad ee dalka Mareykanka kaddib markii dhawaan ay is casishay Sarah Sanders oo iyadu xilkaas heysay.

"Waxaan filaya in qof ka wanaagsan Stephanie Grisham uusan jirin oo qaban karo xilkan" ayay Melania ku tiri barteeda Twitter-ka.

Madaxweynaha Mareykanka, Donald Trump waxaa uu dhinaciisa sheegay in Stephanie Grisham ay tahay qof wanaagsan isla markaasna ay aqbashay xilka loo magacaabay.

"Stephanie waxay aheyd qof ila socday aniga" ayuu weriyeyaasha u sheegay.

"Dad badan ayaa shaqadan rabay, waxaan dadka weydiyay dadka cidda qaban karto xilka, dad badan waxay igu yiraahdeen Stephanie ayaa qaban kartaa, halkan ayay hadda joogtaa, qof kastana waa ay garaneysaa, warbaahinta si wanaagsan ayay ula socotaa" ayuu yiri Trump.

Afahayeenkii hore ee aqalka cad Sanders waxay sheegtay markii ay shaqada ka tegtay inay ku laabaneyso gobolkii ay kasoo jeeday ee Arkansas si ay wakhti ula qaadato qoyskeeda.

Waxay xilliggaas shaaca ka qaaday "Aniga waan ku faraxsanahay in aan shaqada ka tego, waxaana i baddali doonto hooyo kale iyo saaxib qaali ah"

Stephanie Grisham ayaa loo arkay qofkii baddali lahaa Sanders, waxay si dhaw ula shaqeyn jirtay qoyska Trump tan iyo sannadkii 2015-kii.

Gabadhan cusub ee xilkan loo magacaabay ayaa waxay safarka ku wehlin doontaa booqashada madaxweynaha Mareykanka, Donald Trump uu ku tegi doono dalalka Japan iyo Kuuriya toddobaadkan, sida ay ku warrantay warbaahinta CNN.

Stephanie Grisham waxay heyn doonta xilalka xoghayaha arrimaha warbaahinta iyo agaasimaha isgaarsiinta ee aqalka cad.

Waa tuma Stephanie Grisham ?

Stephanie Grisham waxay si dhaw ula shaqeyneysay qoyska Trump tan iyo sannadkii 2015-kii, waxay kamid aheyd qofkii ugu dambeeyay ee ka haray dadkii ka qeyb qaatay ololihii doorashada.

Waxay horraan soo noqotay afahayeenkii xisbiga Jamhuuriga, waxaa kamid ahaa dadkii ay afahayeenka u noqotay Mitt Romney sannadkii 2012-kii.

Intii ay heysay shaqooyinka maamulka, Stephanie Grisham waxay taageero u aheyd marwada koobaad ee dalka Mareykanka, waa haweeneey howlkar ah oo daacad u ah shaqadeeda.

Bishii June ee sannadkii 2018-kii, markii Melania Trump la dhaleeceeyay Jaakad ay xirneyd xilli ay booqasho ku tegtay goob ku taalla gobolka Texas, Stephanie waxay difaacday marwada koobaad isla markaasna waxay eedeyn dusha uga tuurtay warbaahinta Mareykanka.

Stephanie waxay horraan qaaday tallaaboyin geesinimo leh oo ay ku difaaceyso marwada koobaad ee dalka Mareykanka.

BBC