"Dacwada Lagu Soo Oogay Gud C/risaaq Khaliif Dastuurka Ayay Ka Soo Horjeedaa" Xildh. Axmed Khaliif
Hargaysa (HWN) Xildhibaan Axmed Khaliif oo ka tirsan golaha
wakiilada Somaliland ayaa sheegay inay dacwada lagu soo oogay Gudoomiyaha Golaha
Wakiilada Somaliland ay tahay mid ka soo horjeeda dastuurka Somaliland, sida uu
xildhibaanku ku sheegay qoraalkan hoose oo uu baahiyay.
"Eedda Xeer-ilaaliyaha
Guud u gudbiyay Maxkamadda Dastuuriga ah iyo aqbalaadda ay Maxkamaddu aqbashay
dacwadda waa laba arimood oo ka soo horjeedda dastuurka Somaliland.
Sida ku cad qodobka
37aad ee Dastuurka, waaxyaha qaranka ee kala ah garsoorka, xeer-dejinta iyo
fullinta way kala madax-banaan yihiin oo mid waliba waxa uu leeyahay hawlo u
gaar ah oo aan kuwa kale soo farogellin Karin.
Xeer-ilaaliyaha Guud
waxa uu ku eedeeyey Guddoomiyaha Golaha Wakiilada faldembiyeedyo culus oo leh
ciqaab. Dastuurka ayaa caddeeyey sida loola dhaqmayo mudanah lagu eedeeyo inuu
galay dembi. Waxa si cad qodobada 49 iyo 79 ee Dastuurku ay u caddaynayaan in
aan la baadhi Karin oo la eedayn Karin mudane aan xaasaanadda laga qaadin.
Ma jirto meel uu Golaha
Wakiiladdu kaga qaaday Guddoomiye Cabdirisaaq Khaliif xasaanad. Sidaasdarteed,
Xeer-ilaaliyaha Guud awood sharci uma laha inuu eedeeyo. Maxkamadda Dastuuriga
ahina awood uma laha inay qabato oo dhegaysato dacwad aan ansax ahayn oo ku
dhisan dastuur jebin.
Maxkamadda Dastuuriga ahi
meelna kama soo gasho dacwad lagu eedaynayo mudane ka tirsan Golaha Wakiilada.
Waxa si cad u tilmaamay qodobka 79 aad ee Dastuurka oo dhigaya in marka
xasaanadda laga qaado mudane ka tirsan Golaha Wakiilada in dhegaysiga
dacwadiisa ay awood u leedahay Maxkamadda Sare ee Caddaaladda oo ka duwan
Maxkamadda Dastuuriga ah. Maxkamadda Dastuuriga ahi maaha meel lagu dhagaysto
dacwadaha ciqaabta ah.
Arinka labaad ee lagu
eedeyey Guddoomiyaha Golaha Wakiiladda oo ah in aanu ka soo qaybgelin 20 fadhi
oo isku xiga, maaha arin u yaalla Xeer-ilaaliyaha Guud iyo Maxkamadda
Dastuuriga ah sababta oo ah waa arin khuseeya xeer hoosaadka Golaha.
Maxkamadda Dastuuriga
ahina ma qaadan karto doorka Golaha Wakiiladda ee ah inay xeer hoosaadkooda
isku ilaaliyaan.
Haddii gudoomiyaha
Golaha Wakiilada ama mudane kale jebiyo xeer hoosaadka iyo qodobada Dastuurka
ee khuseeya habsami u socodka Golaha, waxa leh awoodda ka go’aan gaadhista
Golaha Wakiiladda.
Xafiiska Xeer-ilaalinta iyo Guddoomiyaha
Maxkamaddu ma waxa ay Golaha la maamulaan buugga xaadiriska iyo fasaxyada
mudanayaasha Golaha? Maxaa iyaga arimahaas gaarka ah geliyay? Yaa u soo cawday
Xeer-ilaaliyaha oo ku wargeliyay in Guddoomiyuhu dhaafay 20 maalmood oo fadhi
ah?
Waxa iska cad in
sababta dacwadan loo geeyey Guddoomiyaha Maxkamadda Sare ay tahay cabsi laga
qabo Golaha Wakiiladda iyo in la doonayo in la baal maro dastuurka iyo Golaha
dadku soo doortay oo la og yahay in aqlabiyadoodu aanay taageri Karin dastuur
jebin iyo in shacabka Sool la sii fogeeyo.
Markii ay xaqiisatay
xukuumaddu in aanay haysan tirada ay u baahan tahay ee Golaha oo 55 mudane ah ,
ayay go’aansatay inay si sharci darro ah u adeegsatay hanaanka ay hada martay
oo ay doonayso inay ka hesho Guddoomiyaha Maxkamadda Sare go’aan uu ku sheegayo
in Cabdirisaaq Khaliif lumiyay xubinimada Golaha.
Qoraalka ogaysiinta ah
ee Guddoomiyaha Maxkamadda Dastuuriga ahi qoray iyada oo caadiyan ay qoraan
ogaysiisyada iyo yeedhmada Kaaliyaha Sare waxa uu muujinayaa in Maxkamaddu
doonayso inay go’aanka soo saarto haddii Cabdirisaaq Khaliif ku soo jawaabi
waayo toddobadaas maalmood gudohood iyo haddii uu ku soo jawaabo, labadaba.
In aan Maxkamadda
Dastuuriga ahi shuqul ku lahayn dacwadaha ciqaabta ah iyo kuwa maamul toonna ee
ay ku kooban tahay ka go’aan gaadhista dacwadaha dastuuriga ah ee lagu murmo
dastuurnimadooda ama tafsiirka sharci waa arin cid waliba taqaan oo aan daah
saarnayn.
Hadaba, waxa ay tahay
inay xukuumaddu ogaato in doonista iyo codka shacabka aan lagu bedeli Karin
go’aanno.
Cabdirisaaq Khaliif
waxa soo doortay shacab, mudane ahaan. Waxa guddoomiye u doortay Golaha
Wakiiladda ee la doortay. Waxa xaasanaadda ka qaadi kara Golaha Wakiilada.,
Waxa guddoomiyenimada
ka qaadi kara Golaha Wakiilada. Haddii ay hayaan eed micno leh oo la dhegaysan
karo ha horkeenaan cidda awoodda u leh ee ah Golaha Wakiilada.
Aqlabiyadda Golaha
Wakiiladu ma aqbali doono in awooddii Goluhu lahaa la maroorsado iyo in xubnaha
Golaha Wakiilada maalinba mid lala baxo.” Ayuu ku yidhi xildhibaanku qoraalkiisa