Hargeysa(HWN):-Xukuumada somaliland ayaa qoysas barakacayaal ah oo ku nool xaafada Ayax 4 oo tiradoodu gaadhayso 350 waxay ku wareejisay sharciyada dhulka ay dagan yihiin.

Munaasibad lagu qabtay magaalada Hargeysa oo ay ka soo qayb galeen masuuliyiinta hay’adda qaxoontiga iyo barakacayaa iyo hay’addaha la shaqeeya ayaa lagu soo bandhigay dadka lagu wareejiyey sharciyada dhulka ay dagan yihiin.

Agaasimaha hay’adda qaxoontiga iyo barakacayaasha somaliland Cabdikariim Axmed Xinif oo ka hadlay munaasibadan ayaa sheegay in xukuumada somaliland ay bixisay inta badan dhaqaalaha ku baxay mashruucan waxaanu yidhi "Mashruucan faylalka dhulka lagu wareejinayo dadkan barakacayaasha ah 80% wax ka badan waxa bixisay dawlada soomaliland, marka ay dhulkii dawladu bixisay ee cashuurtiina ay kala badh bixisay intaasi waxay ku dhaw dahay 80% inta ay hay’adduhu ku faanayaana waa 20%, aamina in waxan ay dawlada somaliland bixisay lagana caawiyey wax kooban.”

Agaasime Cabdikariim Xinif oo hadalkiisa sii wata ayaa intaas raaciyey "Waad dedaalaysaan oo dedaal ayey idinka tahay, inaad ka sii kordhisaan ayaanu doonaynaa oo aad aragtaan dareenkayaga isla markaana qaadataan anaga oo uga jeedna inaad wixii dambe ku samaysan wax ka badal.”

Khadar Qorane oo ka socda hay’adda NRC oo isaguna ka hadlay munaasibadan ayaa guul ku tilmaamay wixii la qabtay "Tani waxay ka mid tahay waxqabadyada rumoobay ee aynu dhinacyada ka joogno dawlad ahaan iyo hay’addaha kale ee la shaqeeya, runtiina 350 qoys ee ardiyadaha dhulka la gudoonsiinayo waxay ka mid yihiin dadweynaha reer somaliland ee ku barakacay wadanka gudihiisa taas oo ay haysato baahida dhanka dhulka iyo guryeynta.”

Mubaarig maxamuud axmed oo isaguna ka socday hay’adda World Vision ayaa ka waramay faa,iidada mashruucan ardiyadaha dhulka lagu gudoonsiiyey qoysaskan barakacayaasha ah "Habka loo kordhiyo ilaha dhaqaalaha ee loo dhiso awooda dadka barakacayaasha ah si ay u gaadhaan heer ay kaligood istaagaan si la mid ah muwaadiniinta kale ee reer somaliland, 350 sharci oo ay lacagtooda bixisay labada hay’adood ee EU iyada oo kaashanaysa NRC taas oo muujinaysa iskaashiga mashaariicda wadanka ka socda taas oo ujeedadu tahay in qofka barakaca ahi uu dareemo in sida qofka kale uu xaq u leeyahay inuu ku nasto halka uu joogo.”

Eng Xuseen Ibraahim Buuni wasiir ku xigeenka wasaarada qorshaynta somaliland oo ka hadlay munaasibadan ayaa waxa uu ka waramay faa,iidooyinka kale ee ku lamaan mashruucan "Dadka maanta fursada u helay inay dawladooda ka gudoomaan taakuladan ay ugu tala gashay, mashruucana waxa uu wataa wax midha dhalkiisa la taaban karo oo ah in dadka xirfadooda iyo aqoontooda la kobciyo, lana baro sida ay uga wada shaqaysan lahaayeen nabad galyadooda iska warhayntooda iyo inay iyagu gacmahooda ku shaqaystaan ayuu mashruucani dhisayaa.”