Xeer-ilaaliyaha Guud ee Jamhuuriyadda Somaliland Cabdiraxmaan Jaamac Hayaan ayaa Maxkamadda Dastuuriga ah u soo gudbiyay, dacwad ka dhan ah Guddoomiyaha Golaha Wakiillada Mudane Cabdirisaaq Khaliif Axmed.

Xeer-ilaaliyaha Guud ee Qaranka Jamhuuriyadda Somaliland mudane Cabdiraxmaan Jaamac Hayaan ayaa u gudbiyay Maxkamadda Dastuuriga ah arji dacwad oogis Dastuur jabin ah, oo lidi ku ah Guddoomiyaha Golaha Wakiillada mudane Cabdirisaaq Khaliif Axmed, kaasi oo ku taariikhaysan 01/06/2023-ka, halka ay Maxkamadda Sare ee Dastuuriga ahina qabatay 04/06/2023-ka.

Maxkamadda Dastuuriga ah ayaa maanta 0662023 Golaha Wakiillada ku socodsiisay qoraal ay ku dalbanayso in la gaadhsiiyo dacwadda Dastuuriga ah ee sumadeedu tahay MS/GD/02/2023 ee ku lidiga ah Guddoomiyaha Golaha Wakiillada.

Sidoo kale Maxkamadda Dastuuriga ah ayaa u dirtay Guddoomiyaha Golaha Wakiillada nuqul kamid ah Dacwadda Dastuuriga ah ee uu ka soo gudbiyay Xeer-ilaaliyaha Guud ee Qaranku, kaasi oo ay kaga dalbanayso  in uu kaga soo jawaabo 7 cisho gudahood, oo ka bilaabmaya taariikhda maanta 06 bisha Juun ee sannadka 2023-ka kuna eg 13-ka bisha Juun ee sannadka 2023-ka.

Wa bilaahi tawfiiq

Ibraahim Maxamed Cali

Madaxa Waaxda Warbaahinta Maxkamadda Sare