Taliyihii Ka Goostay Ciidamada Somaliland Oo Warbaahinta La Hadlay
Waxaa jiray warar la
isla dhex marayey maalmahan, oo sheegayay in taliye katirsanaa ciidanka
jamhuuriyadda iskeed madax banaanida ugu dhawaaqday ee Somaliland, inuu ku
biiray ciidanka ka dagaalamaya gobolka Sool ee SSC.
Sareeye Guuto Saleebaan
Barre Geesood, oo ah abaanduule ku xigeenka ciidamada Somaliland ayaa sheegay
inuu kasoo baxay gabi ahaan ciidamada Somaliland, oo uu haatan kusugan yahay
magaalada Laascaanood.
Geesood, ayaa intaa
raaciyey inuu go’aan sadey tallaabadaasi, oo uu doonayo inuu la qeyb sado
dhibaatooyinka ay ku jiraan dadkiisa.
"Laascaanood illaa iyo
6-dii bishii February, ee sanadkaan 2023-ka. Waxaa ka socday Laascaanood
dagaal, kaasoo u dhaxeeyey dadka reer Sool iyo ciidamada Somaliland, dagaal
kaasoo sababay khasaare aad u fara badan, oo naf iyo maalba leh,” ayuu yiri mar
la weeydiiyey taliyaha sare
Wuxuu carrabka ku
dhuftay in dagaalka ka dhacay gobolka Sool uu sababay dhibaatooyin fara badan,
sida dhimashada dad fara badan, iyo sidoo kale dhaawac aad u badan, iyadoo sida
uu sheegay taliyaha 90% dadka magaaladani ay ka qaxeen.
Taliyaha ayaa ku nuux
nuux saday sida uu marar kala duwan ugala hadlay maamulka Somaliland inaan dagaal
lagu qaadin dadka Laascaanood, maaddaama ay yihiin buu yiri dad ay iyagu
xukumaan.
"Dad badani iney ku
dhinteen, oo ay dad badanina ku dhaawacmeen, magaalada in la duqeeyey, oo
burbur hantiyeed oo fara badani uu ka dhacay, magaalo dhan oo dadkii daganaa ay
ka qaxeen, oo 90% ay ka maqan yihiin, sidaa darted waxaan go’aan sadey maadaama
dadkii uu ku jiro dagaal ay dhibaato ku jiraan qax iyo barakac, iyo duqeyn iyo
xabd joogta ah, maaddaama dadka deegaanka aan kasoo jeedo aan dareenka la qeyb
sado, intaas ayaan uga soo tagay,” ayuu hadalkiisa raaciyey.
Wafdigani ayuu taliyaha
tilmaamay iney kamid ahaayeen wasiirro iyo madax kale oo katirsan ciidanka
Somaliland, halka talooyinkii uu soo jeedinayeyna aan dhag jalaq loo siin, oo
taa badsalkeeda lagu dhaqaaqay wax alle iyo wixii keeni karayay dagaal, oo
dadka Sool lagula kaco.
"Waxaan go’aan saday
inaan kasoo baxo halkaas, oo aan kasii mid ahaan ciidanka Somaliland, oo aan
dadkayga u imaado, aananna kala qeyb galo dhibaatada”, ayuu yiri taliyaha.
Magaalada Laascaanood,
ayaa duqeymaha waxey gaarsiiyeen burbur baaxad leh, taasoo ugu danbeyn ku
qasabtay inuu wax ka badalo go’aan kiisa” ayuu tilmaamay taliyaha.
Taliyaha ayaa sheegay
inaanay ku wehlin soo goosashadiisa wax ciidan ah oo katirsan Somaliland.
Sarreeye Guuto
Saleebaan Barre Geesood, ayaa tilmaamay in muddo ku dhaw lix bilood uu ka war
sugayey bal si uun in loo xaliyo dagaalka Laascaanood, taasoo uu sheegay
inaanay wax kasoo naasa cadaanin.
Taliyaha ayaa inta aanu
soo gaarin magaalada Laascaanood, in markii koowaad u gudbay markii uu ka
baxayay ciidamada Somaliland magaalada Jigjiga, kadibna uu marin kasii dhigtay
Buuhoodle, si uu u gaaro Laascaanood, oo uu haatan kusugan yahay.
Dhanka kale dagaalka ka
socda magaalada Laascaanood, ayaa taliyaha u wareegistiisa dhanka ciidanka ka
dagaalamaya Sool ku macneeyey inuu iyaga markii horaba ku matalayey Somaliland,
haatanna uu dhankooda kaga soo biiri doono dagaalka, oo iyaga uu la safan
doono.
Illaa iyo afar maalmood
ayaa laga joogaa tan iyo xilligii uu kasoo baxay taliyaha dhanka iyo ciidanka
Somaliland, iyadoo uu sheegay inuu ku war galiyey maamulka ciidanka inuu isaga
tagayo shaqada, maadaama aanu la dhacsaneyn habka wax loo maamulayo.
Wuxuu tilmaamay
taliyaha inuu kamid ahaan jiray ciidamada dowladdii Soomaaliya ee 1991-kii
kahor, isagoo tobankii sano ee ugu danbeeyeyna kamid ahaa ciidamada Somaliland.
Taliyaha ayaa xilligii
ugu danbeysay kamid ahaa ciidamada Somaliland, isagoo ahaa abaan duulaha guud
ee ciidamada, kahor inta aanu sidoo kale lasoo shaqeynin ciidamada Puntland
sanadkii 1998-dii, isagoo kasoo noqday taliyaha nabad sugidda iyo sirdoonka.
Wuxuu la shaqo bilaabay
ciidamada Somaliland sanadka markuu ahaa 2015-kii, halka uu la soo shaqeynayey
illaa iyo sanadkii 1973-dii ciidamadii dowladda Soomaaliya, isagoo tababar ku
qaatay kuliyaddii Jaalle Siyaad ee magaalada Muqdisho.
BBC