Sagaal qof ayaa ku dhintay iska horimaadyo ka dhacay guud ahaan dalka Senegal, sida uu sheegay wasiirka arrimaha gudaha saaka oo Jimce ah, kadib markii maxkamadi ay labo sano oo xarig ah ku xukuntay hoggaamiyaha mucaaradka Ousmane Sonko.

Xukunka "dhallinyarada musuqmaasuqa" ayaa laga yaabaa inay ka saarto Sonko, oo ah ninka aadka u mucaaradsan ee Madaxweyne Macky Sall, inuu u tartamo doorashada madaxtinimo ee sannadka soo socda.

Kiiskan ayaa si weyn u kala qaybiyay waddanka Senegal, waxaana ka dhashay rabshado goos-goos ah, balse dad lagu dilay kuwaas oo waxyeello u geystay sumcadda dalkaas ee xasilloonida.

Kadib xukunkii Khamiistii, iska hor imaad ayaa dhex maray booliiska iyo dibad baxayaasha, basaska ayaa lagugubay caasimadda Dakar, iyadoo qalalaase laga soo sheegay meelo kale oo ay ku jirto magaalada Ziguinchor, halkaasoo Sonko uu duqa magaalada ka ahaa tan iyo 2022-kii.

"Waxaan ogaanay in aan ka xunnahay rabshado sababay burburka hantida guud iyo kuwa gaarka ah iyo, nasiib darro, sagaal dhimasho ah oo ka dhacay Dakar iyo Ziguinchor," ayuu yiri Wasiirka Arrimaha Gudaha Antoine Diome oo hadlayay telefishinka qaranka.

Sonko oo hore u ahaan jiray shaqaale dawladeed, waxa uu si weyn uga soo muuqday doorashadii madaxtooyada ee 2019, isagoo kaalinta saddexaad.

VOA