Dowladda Itoobiya Oo Lagu Eedeeyay Tacadiyo Weli Ka Taagan Gobolka Tigray
Hay'adda Human Rights
Watch ee u doodda xuquuqda aadanaha ayaa sheegtay in qeybo kamid ah gobolka
Tigray ee dalka Itoobiya ay weli ka taagan yihiin tacaddiyo iyo barakicin lagu
hayo qowmiyadda Tigrayga.
Dagaal ku dhawaad laba
sano ka socday gobolkaas oo dhaliyay khasaaro baahsan ayaa waxaa heshiis laga
gaaray dhammaadkii sanadkii tegay, waxaana hadda gobolka ka taliya maamul
xiriir la leh xukuumadda Addis Ababa.
Maamulka deegaanka iyo
ciidamada Axmaarada ee ku sugan deegaanada lagu muransan yahay ee Galbeedka
Tigray ee waqooyiga Itoobiya ayaa sii wada in ay si qasab ah uga saaraan dadka
Tigrayga kadib markii heshiis nabadeed uu soo afjaray dagaal ay dowladda
federaalka iyo xulafadeeda kula dagaalameen ciidamada Tigrayga muddo labo sano
ah, sida ay sheegtay hay’ad u dooda xuquuqda aadanaha.
Warbixin ay soo saartay
Khamiistii ayay Human Rights Watch ku sheegtay in in kabadan kun qof oo Tigray
ah si aan sharciga waafaqsanayn loo xiray iyadoo lagu salaynayo aqoonsigooda ka
hor inta aan si qasab ah dalka looga saarin taasoo qayb ka ah olole isir sifeyn
ah.
Waxa ay ku eedaysay
dowladda federaalka in ay ku yartahay danaynta hubinta isla xisaabtanka iyo in
maxkamad la soo taago dambiilayaasha ka masuulka ah.
Ciidamada Itoobiya iyo
kuwa Amxaarada ayaan weli ka hadlin eedeyntan ugu dambeysay.
Galbeedka Tigrayga oo
lagu muransan yahay ayaa waxaa gacanta ku haya ciidamada Axmaarada oo iyaguna
ku andacoonaya in dhulkaas taariikh ahaan ay leeyihiin dadkooda.
Kumanaan ka tirsan
qoomiyada Tigreega ee ka soo qaxay galbeedka Tigray bilawgii dagaalka ayaa weli
ku sugan qaybo kale oo ka tirsan Tigrayga iyagoo gabaad ka dhiganaya dhowr xero
oo barakac ah.
BBC