Malaayiin codbixiyeyaal ah ayaa u dareeray goobaha codbixinta Dalka Turkiga iyadoo doorashadii madaxtinimo ee ku celiska ahayd ee abid dalkaasi ka dhacday ay bilaabatay saaka 8-dii subaxnimo ee wakhtiga maxaliga ah.

In ka badan 64.1 milyan oo qof ayaa u diiwaan gashan inay codeeyaan, oo ay ku jiraan in ka badan 1.92 milyan oo hore uga dhiibtay codadkooda goobaha codbixinta ee dalka dibaddiisa.

Codbixiyayaasha ayaa kala dooran doona madaxweyne Recep Tayyip Erdogan iyo musharaxa ugu weyn mucaaradka Kemal Kilicdaroglu.

Doorashadan ayaa ku soo beegantay iyadoo Turkiga uu la daalaa dhacayo dhibaato dhaqaale oo soo food saartay iyo sidii uu uga soo kaban lahaa dhulgariirkii khasaaraha geystay ee bishii February ee sanadkan ka dhacay Turkiga.