Maxay Mucaaradka Turkiga Ku Dacweeyeen Erdogan?
Ninka ay is hayaan
madaxweynaha Turkiga ayaa dacwad ka gudbiyey madaxweyne Erdogan, wuxuuna ku
eedeynayaa inuu sii daayey fiidiyow ololihiisa ku jira oo lagula xiriirinayo
mintidiinta Kurdiyiinta.
"Dacwad ayaan ka
gudbinay si loogu qabsado fiidiyow been abuur ah” ayuu yiri qareenka Kemal
Kilicdaroglu, Celal Celik.
Mr Kilicdaroglu wuxuu in
ku dhow shan dhibcood ka dambeeyey madaxweyne Erdogan doorashadii dhacday 14
Maajo.
Laakinse weli waxaa la
aaminsan yahay in uu ciriiri gelin karo Erdogan, isagoo noqday qofka kaliya ee
aadka ugu soo dhawaaday labaatankii sano ee uu Erdogan talada hayey, keenayna
in lagu dhawaaqo doorashadii ugu horraysay ee isku celis ah ee Turkiga ka
dhacda.
Markan wuxuu
Kilicdaroglu dalbanayaa in la khasiro Erdogan lacag gaaraysa hal malyan oo
Liire oo u dhiganta $50,000.
Lacagtaas wuxuu sheegay
haddii loo xukumo inuu ugu deeqi doono sanduuqa dhaqaalaha loogu uruuriyo waxbarashada
carruurta ay dhaleen askarta Turkiga ee geeriyootay.
Erdogan ayaa si isdaba
joog ah wuxuu ololihiisa uga sii deynayey fiidiyow lagula xiriirinayo
Kilicdaroglu taliyaha ciidanka kooxda kurdiyiinta (PKK).
Fiidiyowga ayaa
gudbinaya muuqaalka taliyaha PKK oo ay u muuqato inuu taageerayo ololaha
mucaaradka.
PKK waxay Turkiga iyo
saaxiibadiisa galbeedka uga diiwaan gashan tahay urur argagixiso, waxayna
tobanaan sano wadday dagaal galaaftay nolosha tobanaan kun oo qof.
Erdogan ayaa
todobaadkan wuxuu qirtay in fiidiyowga tifaftir lagu sameeyey oo uusan ahayn
kii mucaaradka ay ololaha ku galeen.
Qareenka Kilicdaroglu
wuxuu ku andacoonayaa in Erdogan uu ku xadgubay 'xeerarka anshaxa'.
Laakinse marka dcwadda
laga yimaado, wararku waxay sheegayaan in mucaaradku ay taageero ka haystaan
axsaab Kurdiyiin ah, inkastoo ay qaar kale kala boodeen.
Taasi waxay keenaysaa
in ay soo baxaan kooxo siyaasadeed oo aan dhanna raacsanayn, waxayna culays ku
noqon kartaa Kemal Kilicdaroglu oo ugu yaraan taageero 15% ka haystay
Kurdiyiinta.
Axadda ayuu labada nin
dhex mari doonaa loollan adag marka doorashadaooda la isku celiyo.
BBC