Cuntooyinka Kaa Caawin Kara Korriinka Timaha
Timaha banii'aadanka
waxay ka kooban yihiin borootiin la yiraahdo Keratin kasoo sidoo kale qaabilsan
korriinka cidiyaha iyo maqaarka jirka.
Timaha waxaa sidoo
kamid ah qeybta u xilsaaran kalarka ,qeybta difaaca iyo sidoo kale qeybta hoose
ee qaabilsan tamarta ay u baahan yihiin timaha.
Dhammaanteen waxaan
naga go'aa timaha si dabiici ah maalin kasta marka aan shanleyno ama dhaqeyno
iyo ilaa inta cusub ay nooga soo baxayaan isla inta naga go'day, si kastaba
haddii timaha naga go'ayo ay ka badan yihiin kuwa inoo soo baxaya markaa waxaa
dhici kartaa in qofka uu timo la'aan noqdo ama timaha ay jilcaan.
Arrimo dhowr ah ayaa
saameeya korriinka timaha kuwaas oo horseeda in timaha ay si kumeel gaar ah u
daataan ama horseeda in qofka ay gasho bidaar, waxaana kamid ah isticmaalka
dawooyinka qaar sida kuwa kimikada ah iyo sunta Nicotine.
Sidoo kale timaha oo
daata waxaa sababaa xanuunada ka dhasha hormoonada, cudurka tayroodka ama
qumanka, welwelka iyo nafaqo la'aan.
Cuntooyinka qaabilsan
korriinka timaha
Maadaama ay timuhu ka
samaysan yihiin borotiin, qofka waa in uu qaataa cuntooyinka leh borotiin-ka,
waxayna kaalin weyn ka qaataan korriinka timaha gaar ahaan timo xooggan oo
caafimaad leh.
Haddii aadan cunin
borotiin kugu filan, timahaagu waxay u badan tahay inay jilcaan oo ay daataan,
Cuntooyinka uu ku yar yahay borotiinka waxay keeni karaan korriinka timaha oo
xaddidan iyo xitaa waxay qarka u saaran yihiin inay timaha daataan.
Cuntooyinka leh
borotiin-ka waxaa kamid ah kalluunka, hilibka digaagta, lawska iyo digirta
qaar.
Cuntooyinka leh maadada
Iron
Iron waa macdan muhiim
u ah korriinka timaha, qofka ay ka maqan tahay maadadan waxaa ka daataa timaha.
Cuntooyinka laga helo
maadada Iron waxaa ka mid ah: hilibka caadiga ah, digaagta, kalluunka,
khudaarta cagaaran gaar ahaan noocyada kala ah, ansalaatada iyo isbinaajka.
Fiitaamin C
Waxaa wanaagsan in
Fiitaamiin C lala qaato cuntooyinka kale ee leh macdanta Iron, Fiitaamiin C
waxay naga caawisaa in jirkeena uu soo saaro maadada collagen ee xoojisa
xiddida qaabilsan korrinka timaha.
Cuntooyinka ay ku badan
yihiin Fiitaamiin C waxaa kamid ah, miraha sida blackcurrants, canabka, liin
macaanta, baraadhada, seytuunta, babaayga iyo miraha loo yaqaanno Kiwi.
Fiitaamiin A
Fiitamiin A waxa u
baahan jirkeena si uu u sameeyo maadada Sebum oo qaabilsan jilicsanaanta iyo ka
hortagga agoolka.
Waxaana kamid ah
cuntooyinka Fiitaamiin A leh, karooto, bocorka, baraadhada iyo khudaarta kale.
Maadada Zinc
Maadada Zinc waxay ka
hortagtaa agoolka iyo timaha oo daata.
Cuntooyinka leh Zinc
waxaa kamid ah, hilibka lo'da, Ukunta iyo galleyda.
Fiitaamiin E
Qorraxdu waxay dhaawici
kartaa timaheena sida ay u dhaawici karto maqaarkeena markaa hubi inaad cuntid
cuntooyinka ay ku badan yihiin fitamiin E si aad u ilaaliso timahaaga, waxaa
kamid ah cuntooyinka leh Fiitaamiin C, lowska.
Biotin
Biotin waa fiitamiin B-ga
ku milma biyaha, qofka ay ku yar tahay maadada Biotin waxaa dhacdaa in qofka
timahiisu ay daataan ama jilcaan, cuntooyinka hodanka ku ah Biotin waxaa kamid
ah, haruurka, beer, ukunta, iyo nooc kamid ah burka.
BBC