Finland Oo Noqonaysa Dalkii 31aad Ee Xubin Ka Noqda NATO
Xoghayaha Guud ee NATO
Jens Stoltenberg ayaa sheegay in Finland ay ku biiri doonto isbaheysiga
militari maalinta Salaasada ee berri, wax ka yar hal sano, ka dib markii uu
dalkani gudbiyay codsigiisa ku biiritaanka NATO, tallaabadan oo jawaab u ahayd
duulaankii uu Ruushku ku qaaday dalka Ukraine.
Stoltenberg ayaa u
sheegay warfidiyeenka, ka hor kulanka wasiirada arimaha dibada ee NATO, in
Finland ay ku soo darayso isbaheysiga ciidan milateri oo si wanaagsan u
tababaran, una qalabaysan, ka dib markii dalka Turkigu uu ansixiyey ku
biiritaankooda, maadaama loo baahan yahay in dhammaan dalalka xubnaha ka ah
NATO inay ansixiyaan dal kasta oo ku soo biiraya.
Xoghayaha guud ee NATO
ayaa sheegay inuu si wanaagsan ugu qanacsan yahay in Sweden ay sidoo kale xubin
ka noqon doonto isbahaysiga NATO, taasina ay mudnaanta koowaad ugu jirto inay
hirgasho.
Turkiga ayaa si weyn
uga soo horjeeda xubinimada Sweden, iyada oo Turkigu ku eedaynayo inay Sweden
gabaad siiso kooxo uu u arko argagixiso. Xoghayaha NATO ayaa sheegay in Sweden
ay fulisay tallaabooyinkii lagu heshiiyey ee walaaca ku hayey Turkiga.
Xoghayaha NATO ayaa
sidoo sheegay in madaxweynaha Ruushka Vladimir Putin inuu dalbaday in hoos loo
dhigo joogitaanka ciidanada NATO ee dhinaca bariga ka hor duullaankii
ballaadhnaa ee Ruushku ku qaaday Ukraine, halka dalabaadkii Putin ee ku
aaddanaa Finland iyo Sweden ay u dhaceen si caksi ah.
Xoghayaha ayaa sheegay
in haatan wixii ka dambeeya ay ciidamo badan oo NATO ahi ay joogi doonaan
dhinaca bari ee Isbahaysiga maadaama xubno cusbi ay ku soo biireen NATO.
Sources: VOA