Waxyaabaha inta badan diiradda la saaro waxaa kamid ah nadiifinta guryaha inkasta oo ay guryaha kala duwan yihiin, Dadka qaar maalin kasta guryahooda ayay nadiifiyaan halka qaar kalena ay hal toddobaadkii nadiifiyaan guryhaooda.

Sida laga soo xigtay, sahan uu sameeyay macadka qaran ee ka faalooda arrimaha nadaafadda ee Mareykanka, boqolkiiba 70% guryaha iyo dhulka ku xeeraan waxaa la nadiifiyaa hal mar sanadkiiba.

Dadka waxay ku kala duwan yihiin inay mudnaanta siiyaan qeybaha kala duwan ee guryaha, qaarkood waxay diiradda saaraan jikada halka qaar kalena musqusha, meelaha muhiimka ah in la nadiifiyo waxaa kamid ah oornada, musqusha, sariiraha- halkaasoo si weyn ay ugu uruuraan jeermiska, fungi iyo bakteeriyada.

Si kastaba ha ahaatee, waxaa jira shay gaar ah iyo meelo bannaan oo laga yaabo in aan diiradda la saarin, laakiin waxaa halkaas ku uruuraa wasakhda oo ka dhalan kara caafimaad darro.

Waxaan halkan idiin kuugu soo gudibneynaa afar shay oo muhiim ah in la nadiifiyo balse dadka badanaa aysan ku baraarugsaneyn.

Jalmad ama kirli

Baaritaan ay sameeyeen Ururka Caafimaadka iyo Badbaadada Dadweynaha ee Mareykanka ee loo soo gaabiyo (NSF) waxay muujinaysaa in mid ka mid ah waxyaabaha lagu isticmaalo jikada ee inta badan uu ku uruuro jeermiska uu yahay kirliga ama jalmadda lagu karsado kafeeda.

Cilmi-baarayaasha waxay gudaha jalmadda ka heleen ilaa 97 nooc oo kala duwan oo jeermis ah.

Arrinta xaqiiqada ah ayaa ah in biyaha kulul aysan jeermiska ka saari karin jalmadda iyo sidoo kale maadada caffeine-ka ee kafeega ku jirta ay ka qeyb qaadato kobaca bakteeriyada gudaha kirliga.

Sidoo kale , jalmadda marka uu ku uruuro waskhada waxay saameyneysaa shaqada welkaas.

Khuburrada waxay soo jeedinayaan in saddexdii biloodba la nadiifiyo jalmadda.

Joodariga

Ma fududo in si joogto ah loo nadiifiyo joodariga lagu seexdo.

Xaqiiqada waxay tahay, in jirka banii'aadanka uu maalin kasta soo saaro 1.5 garaan oo maqaarka dhintay ah kaasoo had iyo jeer ku uruuro joodariga.

Daraasad lagu daabacay joornaalka Royal Society Open Science journal 2018 ayaa muujisay nadaafadda joodariyaasha uu seexdo qofka bini'aadamka ah marka loo eego xayawaanka chimpanzee.

Daraasadda waxay tilmaamtay in bini'aadamka ay wasakheeyaan joodariga ku dhawaad ​​boqolkiiba 30% oo ka badan wasakheynta xayawaanada kale.

Wasakhdaas waxay ka dhalataa in maqaarka unugyadiisa dhintay ee uu soo saaro banii'aadanka ay ku uruuraan joodariga, sidoo kale boorka iyo dhididka qofka, waxaa ka dhalaan karaa bakteeriya iyo kutaan.

Khubarada ayaa sheegay in sanadihii u dambeeyay ay soo baxeen habab kala duwan oo lagu nadiifiyo joodariyaasha.

Waxaa sidoo kale dadka lagu la talinayaa inay qoraxda dhigaan joodariyaasha si looga hortaggo bakeetiyada ama jeermiska.

Bacaha lagu soo adeegto

Waxaa dadka lagula taliyaa inay iska tuuraan ama ay nadiifiyaan bacaha marka ay isticmaalaan kadib, ugu yaraan toddobaadkii waa in qashinka ku riddaa bacaha aad kusoo adeegatay.

"Haddii aad adeegsaneyso bacihii aad kusoo qaadatay hilibka iyo khudaarta, waxaa si deg deg ah ugu dhalan karaa bakteeriya" ayuu yiri Charles P. oo ka tirsan jaamacadda Arizona.

Shaqaalaha Machadka Nadaafada Qaranka ee Maraykanka ayaa ku talinaya in bacahaas gacanta lagu dhaqo - ugu yaraan hal mar toddobaadkii.

Suufka lagu dhaqo weelasha

Inta badan suufka waxaa lagu dhaqaa weelasha si ay uga saaraan wasakhda iyo mirirka, dadka diirsadda ma saaran nadaafadda suufkan maadama saabuunta mar kasta lagu isticmaalo suufkaas.

Hagaag, daraasad ay samaysay Jaamacadda Furtwangen, ee Jarmalka, ayaa tilmaantay in laga yaabo inay jiraan tiro badan oo jeermis iyo bakteeriyada halista ku ah banii'aadanka laga helo suufka lagu dhaqo weelka.

Daraasadda waxay sidoo kale sheegtay in suufkan laga helay ilaa 362 nooc oo bakteeriya ah.

Khuburrada waxay soo jeediyeen in suufkan lagu dhaqo maadada koloriin toddobaadkiiba mar si looga fogaado bakteeriyadan halista ah.

BBC