Sacuudiga Oo Soo Saaray Xayiraado Ramadaanka Ku Aaddan
Sacuudi Carabiya ayaa
shaaca ka qaadday awaamiir iyo xayiraado cusub oo ku aaddan habka loo gudanayo
cibaadada bisha barakeysan ee Ramadhaanka sanadkan.
Awaamiirta iyo
xayiraadaha ay wasaaradda Diinta ee Sacuudiga shaacisay waxaa ka mid ah
sameecadaha masaajidda ee dibadda inaan la furi karin, la socoshada dadka
ictikaafaya 10-ka dambe ee bisha Ramadhaan, xadiidaadda deeqaha iyo mamnuucidda
duubista ama baahinta salaadaha masaajidda dhexdooda iwm.
Bayaan Jimchi
wasaaradda ka soo baxay oo uu shaaciyey Wasiirka Arrimaha Diinta Sacuudiga
Cabdulatiif Al-Sheikh waxay ka kooban tahay 10 qodob oo ay waajib tahay dadka
ku nool Boqortooyada Sacuudiga iney u hoggaansamaan.
Qodobbadaasi oo ay ka
mid yihiin ‘Imaamyada iyo Mu’addiniinta masaajidda iney masaajidda ka habsaami
karin haddii ay jirin arrimo daruuri ah,” Salaadda taraawiixda inaan la
dheereyn karin, Salaadda tahajudka ee tobanka dambe in la fududeeyo iyo in la
dhammeeyo ka hor inta salaadda subax aan la gaarin.
Dadka bisha ramadhaan
masaajidda ku cibaadeysanaya iney masaajidda Kaameera la geli karin sawirrana
ay ka qaadi karin Imaamka, Muwaddinka iyo Muslimiinta kale ee dukanaya ayna ku
baahin karin warbaahinta kala duwan iyo baraha bulshada intaba.
Wasaaraddu waxay sida
oo kale Imaamyada masaajidda ay ku waajibisay iney la socdaan xogta dadka
masaajidda ku ictikaafaya tobanka dambe ee bisha Ramadhaan aqoonsiyadoodana ay
hubiyaan.
Awaamiirta wasaaradda
ka soo baxay waxaa lagu mamnuucay iney masaajiddu uruurin karin lacagaha tabarrucaadka
ama sadaqada ah oo dadka sooman lagu afuriyo iyo in cunta lagu diyaariyo
barxadaha masaajidda oo loo oggol yahay oo keli ah gudaha masaajidka
arrintaasina ay mas’uul ka yihiin imaamyada iyo mu’addiniinta masaajidda.
Arrinta kale ee muranka
dhalisay oo ay wasaaraddu soo saartay waxay tahay codka samiicadaha dibadda in
la damiyo xilliyada salaadaha taraawiixda iyo tahajudka lagu jiro
sameecadahaasina la furi karo oo keli ah xilliyada aadaanka oo dadka salaadaha
looga yeerayo iyo carruurta in masaajidda la keeno.
Xayiraadaha iyo
Awaamiirta Wasaaradda Diinta Sacuudiga ka soo baxay waxaa ka carooday si weyna
uga falceliyey muslimiinta daafaha caalamka ku kala nool iyaga oo sheegay
tallaabbadan iney tahay mid ay Dowladda Sacuudiga oo ka amar qaadaneyso
Dhaxalsugaha Maxammed Bin salmaan ay doonayaan iney xaddidaan saameynta ay
diinta islaamka ku leedahay nolosha guud, si la mid ah kaligii taliyihii
Tuunisia xukumayey Zine El Abidine Bem Ali iyo Midowgii Soofiyeeti ee hore.
Iyada oo weli ay
soconayaan dhaleceeynta loo soo jeedinayo Sacuudiga, haddana dowladda Sacuudiga
waxay sii waddaa iney dhiirrageliso bandhigyada riwaayadaha iyo muusigga iyada
oo martiqaadeysa fannaaniinta reer galbeedka ee caanka ah si ay indhaha caalamka
u soo jiidato.
Afhayeenka Wasaaradda,
Abdullah Al-Enezi, oo talafishiinka Al-Sacuudiya u warramay wuxuu meesha ka
saaray walaaca ay dadku ka muujinayaan awaamiirta wasaaradda ka soo baxay,
wuxuuna sheegay wasaaraddu iney ishortaageyn masaajidda in dadka lagu afuriyo
balse ay dooneyso in la nidaamiyo si nadaafadda masaajidda loo ilaaliyo.
Afhayeenku oo difaacay
sababta duubista iyo baahinta salaadaha loo diidayna wuxuu sheegay in looga gol
leeyahay khaladaadka aan lagu tala gelin ee iman karo si loo yareeyo.
BBC