Kulan Kedis Ah Oo Dhex Maray Wasiirada Arrimaha Debedda Ee Ruushka Iyo Maraykanka
Xoghayaha Arrimaha
Debedda ee Maraykanka Antony Blinken iyo Wasiirka Arrimaha Debedda ee Ruushka
Sergey Lavrov ayaa Khamiistii yeeshay wadahadal kooban, intii uu socday shirka
Kooxda 20-ka dal, waana kulankii ugu sarreeyey ee ay yeeshaan labadan dal,
muddo bilo ah.
Masuuliyiinta
Maraykanka ayaa sheegay in Blinken iyo Lavrov oo si gaara ugu kulmay shirka
G-20 ee ka socda dalka Hindiya, inay wada-sheekaysteen muddo gaadhaysa illaa 10
daqiiqadood.
Masuul sare oo ka
tirsan dawladda Maraykanka ayaa sheegay in Blinken uu kala hadlay Lavrov illaa
saddex arrimood, oo ay ka mid yihiin, in Maraykanku uu taageerayo Ukraine,
xilli kasta oo qaadato, si loo soo afjaro dagaalka, in Ruushku uu ka noqdo
hakinta uu ku sameeyeen heshiiska iska war-haynta hubka nukliyeerka labada dal
ee The New START, iyo in Ruushku uu sii daayo muwaadinka u dhashay Maraykanka
ee Paul Whelan.
Masuulka Maraykanka ah
oo aan ogolayn in magaciisa la shaaciyo ayaa ka gaabsaday inuu faahfaahiyo
falcelinta ka timi Lavrov, laakiin wuxuu sheegay in Blinken aanu arag wax
isbedela oo ku yimi hab-dhaqanka Ruushka.
Ruushku wax faallo ah
oo degdeg ah kama bixinin wadasheekaysiga dhex maray labada dal, hase ahaatee
afhayeenka wasaaradda arrimaha debedda ee Ruushka ayaa sheegay in Blinken uu
codsaday inuu la hadlo Lavrov.
Wuxuu ahaa kulankii ugu
horreeyey ee ay labada masuul yeeshaan tan iyo xagaagii hore, xilligaas oo
Blinken iyo Lavrov ay khadka telefoonka ku wada hadleen.
VOA