Hargaysa (HWN) Musharax Madaxwayne ee Xisbiga Mucaaradka ah ee Waddani ayaa shacabka dalka Turkiga kaga tacsiyadeeyay dadkii ku dhintay masiibadii dhulgariirka ee dalkaasi ku dhufatay.

Cirro ayaa qoraal uu baahiyay ku sheegay in uu Booqday xafiiska dawlada Turkigu ku leedahay Hargaysa.

"Waxa aan dhawaan tegay Qunsuliyadda Guud ee Dawladda Turkiga ah ee aan walaalaha nahay ku leedahay Caasimadda JSL ee Hargeysa si aan uga tacsiyeeyo Dawladda iyo Shacabka Turkiga ba dadkii ku dhintay musiibadii dhulgariirka ahayd ee dhawaan ka dhacday wadankaas. Waxa aan saxeexay buugga tacsida ee loo furay dadka ku dhintay dhul-gariirkaas.

Eebe ayeynu naxariistiisa u weydiineynaa iyo in uu ku casuumo Jannatul Firdowsa dadkii halkaas ku geeriyooday, annaga oo la qeybsaneyna xannuunka iyo dhibka ka soo gaadhay walaalaheen Turkey.” Ayuu yidhi Cabdiraxmaan Cirro.