Hargaysa (HWN) Waxgarad iyo aqoonyahan ka soo jeeda Gobolka Awdal ayaa maalmihii ugu dambeeyay kulan kulahaa magaalada Adis ababa ee dalka Itoobiya.

kulanka ay lahaayeen waxgaradka ka soo jeeda beesha Samaroon ayaa ku saabsan sidii beeshaasi ay iskugu iman lahayd shir ay kaga tashanayso aayaheeda, maadaama shacabka deegaanadaasi ay tabasho ka qabaan xukuumada Muuse Biixi.

Sida xogaha ay helayso shabakada Hadhwanaagnews ay sheegayaan weli lama shaacain halka shirkaasi ka qabsoomidoono.

Shirkan ay qaban qaabinayaan Beesha Samaroon ayaa ku soo aadaya xili Beesha Dhulbahante uu shir ay beeshaasi aayaheeda kaga tashanaysaa uga socdo magaalo madaxda gobolka Sool ee Laascaanood.

Beelaha Darafyada Somaliland ayaa inta badan ka cawda beesha Dhexe ee Isaaq, taasi oo isku koobtay jagooyinka ugu sareeya xukuumada iyo sidoo kale ilaha dhaqaalaha leh ee Dalka.

Isku soo wada duuboo haddii culayska hada ay beesha Dhulbahante saartay Xukuumada Muuse Biixi ay ugu darsanto Tabasho ka soo yeedha beesha Samaroon, saamayn intee leeg ayay ku yeelan kartaa xukuumada Somaliland ee uu hogaaminayo Madaxwaynaha wakhti xileedkiisii dhamaaday ee Muuse Biixi?