Muuse Biixi Oo Loosoo Jeediyay In Uu Xilka Ku Wareejiyo Saylici
Hargaysa (HWN) Siyaasi Cali
Maxamed Yuusuf (Cali Gurey) ayaa sheegay in ay cadahay in Muuse Biixi ku
fashilmay hogaaminta Somaliland, ayna haboontahay in uu ka horbaydho sidhiig
cusubi uyimaado, sida uu ku sheegay qoraalkan hoose oo uu baahiyay.
"TALO ADIGAA KU NOOL EE
IYADU KUGUMA NOOLA
Somaliland meel ay ku
socoto anigu garan maayo. Muuse Biixi in uu ku fashilay hogaamintii qarankuna
way caddahay oo cidna caad kama saarna. In uu ka horbaydho doorashada oo
isbedel cusubi yimaado ma ogola sida aan arkayo. Khilaafkii siyaasdda markaa
waxa laga filaa waa halkiisii iyo ka sii daran. Qarax Laascaanoodna goor aan
loo fadhiyin ayuu durba sidii webi karaar dhaafay in uu karkaarka jebiyo halis
u yahay.
Muuse hadal lagama hayo
aamuskuna khayr uma soo sido. Xalka sida uu u bartay waa in tiisa uu qasab ku
meel mariyo cidii ka hor timaad waa xadhig iyo xabad waxa uu miciinsadaa ee xal kale ku deyi maayo sida caadada u ah ee looga bartay. Xadhig iyo xabbadina
xal maaha mana u noqon karto khilaafka siyaasadda iyo qarax Laascaanood midna.
Hadii ay sidaa tahay
xaaladda Somaliland kama dabaalan karo xalkuna waa isbedel dhakhso ah isaguna
dee doorasho ayuu ku xidhan yahay. Sida ay ku socoto malaha Muuse waxa u dan ah
in xilka uu iska dhiibo uu kaga xuubsiibto Madaxwayne xigeenkiisa si uu dalka
doorasho degdeg ah u gaadhsiiyay. Hadii kale tu walba ka yaab oo in xaaladda
dalku ay farahiisa ka baxdo ama Somaliland ay gacantiisaba ku burburto maaha
wax aan laga filan karayn.
Tii Allehna maqan waana
ta ay noqonayso eh tu kale noqon mayso eh Allahayow sida roon uun saw maaha
waxa inala gudbooni.” Ayuu yidhi Cali
Maxamed Yuusuf (Cali Gurey).
Muuse Biixi ayaa dadka
dhaliilaa ku sheegaan nin aan talada qaadan oo tiisa ku socda.