Gabay : Gulufkii Wax–Ma-Xeersha (1984-1990)
Gabayga soo socda waxaa lagu magacaabaa: Gulufkii Wax-Ma-Xeersha waxaanu ka koobanyahay 40 beyd. Gabaygu wuxuu ku saabsanyahay gulufkii dagaal ee Taliskii Siyaad Barre ku qaaaday Gobolladii Waqooyigii siiba intii u dhaxaysay 1984-1990 laguna galay dembiyo culus oo kala daran sida:
Dil, kufsi, xadhig-silcin, boob, dhac, gawrac-wadareed (Gummaad), magaalooyin dumin, tuulo gubid, barakicin iwm. Gabaygu wuxuu caddaynayaa sida dagaalladaasu uga duwanaayeen dhammaan dagaalladii ka dhexdhicijiray Somalida sababta oo ah waxaa lagu xad-gudbay dhaqanka iyo Islaamnimada, waxaanu ku salaysnaa nacayb. Ummadda Somaliland waa ka heshiisay waana iska cafiday dhibaatooyinkii dagaaladaas sannadkii 1991.
Gabaygu waa xusuus taariikh madow oo la soo maray loona baahanyahay in laga fogaado mustaqbalka.
GABAYGA: WAX-MA-XEERSHA (1984-1990)
Weligeedba Somali godob, iyo colaad guuna
Gawraca dhegaha lalasimiyo, guluf la kala qaado
Rag-wareematada gabbal-dhiciyo, waaga hore gaada
Dhiilladu geyiga wayjirtiyo, gama`la diidaaye
*********
Guullowse dhaqanbuu lahaa, tanise waa gaare
Gawrac wadara lama geysanjirin, ama gummaad hoose
Gamankiyo haweenkaba majirin, cadaw gabraartaaye
Da` gabowday looma qoosanjirin, xawda gelin joogi
*********
Garyaqaanka lama dooxijirin, kala guraha beesha
Seedigu ma gayijirin maglida, gumuca baaruudda
Guri gogosha lama baadhijirin, raarta guradiisa
Dumar dahabka lama goosanjirin, waa gunnimo weyne
*********
Muxsanaadka guudkood majirin, gocor sadheeyaaye
Gobonimada lama xoorijirin, guurka dhaqankiisa
Guuto laguma bixijirin miyiga, gebagebayn Beesha
Ma-yeedhaanka lama goynjirin, nolosha guuraaga
*********
Diyaarado gantaal tuurayiyo, hoobiyaha gawle
Taangiyada gurguurtiyo madfaca, guuxu damiwaayay
Bendarada ma gubijirin hub culus, goostay dumintooda
Tarabtarabka maatada ma go’in, daadsan gudahooda
*********
Bendar lagama gudijirin habeen, Goobta noloshaada
Baxadsoore guuraha ma jirin, barakac guud beesha
Dal shisheeye looma guurijirin, geedi maganeedka
Teendho gaaban lama seexanjirin, baco gawaan meela
*********
Buryariyo saliid geed la dhigo, looma gelin faylka
Xeryo duumo kuma goobanjirin, taaha gama`diidka
Tarab-tarab dad uma geeriyoon, leylka gudihiisa
Gaadhi-gacanka lama saarijirin, meydka guradiisa
*********
Qabiil guud laguma duulijirin, muu gilgilin Geeska
Geyigiisa ma hawaysanjirin, duul gashaday laabta
Wax-ma-xeersha go`e lama aqoon, godob ma guuraana
Godka iilka iyo Aakhiraa, loo gayoonjiraye
*********
Kufrinimo dadbaa galabsadiyo, gubasho naareede
Dawladnimo dadaan gaar u helin, eed ku gale weyne
Geb hadduu ayaxu meel ku dhaho, geeduhu tiriye
Geyigaba fasaadki ka dhacay, khayrki miyuu guuray
*********
Daarood hoggaankiis la gubay, oo la kala guurye
Islaamnimada ay gudub-mareen, uunku garanwaaye
Duulkii ku kaca talo gurracan, eede gacantoode
Dulmigu garaad-xumi u galay, gocosho dheer reebye
*****************
Dhammaad
Curiye: Ibrahim Hassan Gagale
Sannadka La Tiriyay: 1996
AFEEF:
Hadhwanaagnews marnaba masuul kama aha Aragtida dadka kale. Qoraaga ayaa xumaanteeda, xushmadeeda iyo xilkeeda sida. waxa kaliya oo Hadhwanaagmedia dhiirigalinaysaa, isdhaafsiga aragtida, canaanta gacaliyo talo wadaagga!