Turkiga Oo Tallaabo Adag Ka Qaaday Falkii Lagu Gubey Kitaabka Qur'aanka
"Sweden
yaanay filannin in Turkigu tageero ka mid noqoshadeeda NATO", ayuu
madaxweynaha Turkiga Erdogan yiri shalay, maalmo uun ka dib markii kitaabka
Qur’aanka kariimka ah lagu gubay dibad baxyo ka dhacay magaalada Stockholm ee
dalka Sweden.
Sweden
ayaa codsatay ka mid noqoshada NATO ka dib markii uu Ruushka weeraray Ukraine –
balse Turkiga oo xubin muhiimka ka ah NATO ayaa shuruudo ku xiray ka mid
noqoshada Sweden iyo Finland ee NATO.
Kurdiyiinta
ku nool Sweden oo mudaharaad ku daldalay wax ay u ekaysiiyeen Erdogan ayaa
waxaa xigay in kitaabka Qur'aanka ah lagu hor gubo safaaradda Turkiga ee Sweden
Sabtidii.
Jawaab
uu ka bixiyey Madaxweyne Erdogan ayuu ku yiri, " Sweden yaanay filanin
taageerada Turkiga ee ka mid noqoshadeeda NATO”.
"Waxaa iska cad in
kuwii ceebta intaa le'eg ku sameeyay safaaradda dalkeena horteeda aysan naga
sugi karin wax wanaag ah oo ku aaddan codsigooda."
Mudaharaadkii Sabtida
lagu gubay kitaabka ayey dawladda Sweden fasax usii oggolaatay ka hor inta aanu
bilaaban balse gubista Qur'aanka ayaan fasaxa ku jirin.
Erdogan ayaa
cambaareeyay dibad bixii ugu dambeeyay ee lagu gubay kitaabka Qur'aanka, kaas
oo uu fuliyey siyaasi midigta ka tirsan xisbiga midigta fog ee Denmark, wuxuuna
Erdogan falkan ku tilmaamay mid aflagaaddo ah oo aanay xuquuqda hadalku difaaci
Karin.
Dawladda Aweden ayaa
dhankeeda dhaleecaysay mudaharaadka.
"Sweden waxa ay
leedahay xoriyatul qowlka oo aad u qoto dheer, laakiin macnaheedu maaha in
dowladda Sweden ama nafteydu ay taageersan tahay fikradaha la soo
bandhigay" ayuu yiri wasiirka arrimaha dibadda Sweden Tobias Billstrom
sabtidii.
Isagoo ka jawaabaya
hadalka Erdogan Isniintii, ayuu Mr Billstrom sheegay inuu doonayo inuu si sax
ah u fahmo waxa uu yiri hoggaamiyaha Turkiga ka hor inta uusan faallo ka bixin.
"Sweden waxay
ixtiraami doontaa heshiiska u dhexeeya Sweden, Finland iyo Turkiga ee ku
saabsan xubinnimada Nato," ayuu raaciyay.
Sweden oo ay weheliso
Finland ayaa dalbaday in ay ku biiraan gaashaanbuurta Nato kadib markii Ruushka
uu galay Ukraine, balse mudaaharaadyadii u dambeeyay ayaa uga sii daray
xiisadda awalba taagneyd.
Xoghayaha guud ee
gaashaanbuurta Nato Jens Stoltenberg ayaa sheegay in xoriyatul qawlka ay tahay
hanti qaali ah oo ka jirta waddamada Nato, wuxuuna sheegay in falalkan ay
yihiin kuwo aan munaasib ahayn, balse aysan ahayn kuwa si toos ah sharci darro
u ah.
Turkiga oo ah waddan
Muslim ah ayaa cambaareeyay go’aanka ay dowladda Sweden ku oggolaatay
mudaaharaadka kuna tilmaamay mid aan gabi ahaanba la aqbali karin.
"Qofna xaq uma
laha inuu bahdilo muqadasaadka" ayuu yiri Mr Erdogan oo khudbad telefishin
jeedinayey Isniintii.
"Markaynu wax nidhaahno
si daacad ah ayaanu u sheegnaa, marka qof na ixtiraamo, waxaanu dhignaa
meeshiisa,"
Wasiirka gaashaandhigga
Hulusi Akar ayaa sheegay in Turkigu uu baajiyay booqashadii dhiggiisa Sweden
Pal Jonson ku imaan lahaa Turkiga ka dib markii "uu arkay in aan wax
tallaabo ah laga qaadin... mudaaharaadyada laga yaqyaqsoodo".
Booqashooyin is daba
joog ah oo ay hore wasiirrada ugu sarreeya Sweden ku tageen caasimadda Turkiga
ee Ankara ayaa rajo galinaysay in safarkan uu fududeeyo diidmada ku biiritaanka
Sweden.
Maaddaama Turkiga uu
horey xubin uga ahaa Nato, wuxuu hor istaagi karaa waddan kale inuu ku biiro,
waxaana uu horey u soo bandhigay dalabyo dhowr ah oo Sweden ku socda. Taas oo
ay ku jirto in loo gacan geliyo qaar ka mid ah Kurdiyiinta ku nool Sweden oo Turkigu
sheegay in ay yihiin argagixiso.
Horraantii bishaan,
ra'iisul wasaaraha Sweden ayaa sheegay in dibad baxayaasha Kurdiyiinta ee
Stockholm ka soo laadlaadiyay sawirka madaxweynaha Turkiga ay isku dayayeen
inay carqaladeeyaan codsiga Sweden ee Nato.
Wasiir ka tirsan Sweden
ayaa falkan ku tilmaamay mid laga xumaado, balse Turkiga ayaa sheegay in
cambaareyntaasi aysan ku filneyn.
BBC