Wararkii Ugu Dambeeyey Xaaladda Laascaanood, Abaabulka Shirarka Dhaqan Ee Xukuumaddu Shuruudda Ku Xidhay.
Laascaanood, - (HWN)-
Kadib markii ay dorraad xukuumadda Somaliland soo saartay Go’aamo la xidhiidha
xaaladda xal u helidda xiisadihii dhawaan ka aloosmay magaalada Laascaanood ee
Caasimadda Gobolka Sool, kuna baaqday in ay ogoshahay shirarka dhaqan ee halkaasi
ak socda oo ay shuruudo ku xidhay haddana wali waxa halkii ka sii socda
tallaabooyin halis ku ah qaranimada Somaliland oo ay oo ay ku hawlan yihiin
kooxo abaabulan oo Bulshada ku guubaabinaya kacdoon iyo arrimo liddi ku ah
qaranimada.
Shalay subax waxa
magaalada Laascaanood goobo badan oo ka mid ah laga qotomiyey Calanka Buluugga
ah ee Soomaaliya halka sidoo kale guryaha iyo dayrarka qaarkood la
marinayay ranji muujinaya calankaasi oo
lagu lammaaneeyey Calan kale oo ay ku sheegeen ka khaatumo.
Magaalada Laascaanood
waxa soo gaadhayay saacadihii la soo dhaafay inta badan Isimada Dhaqanka ee
waaweyn ee Beesha Dhulbahante kuwaas oo uu hore ugu yeedhay casuumad shirna ugu
baaqay Garaad Jaamac Garaad Ismaaciil oo ka mid ah garaadada wakhtigan sida
weyn uga so hor jeeda Somaliland horena u taageersanaan jiray. Dhinaca kale
Garaadka Guud ee Beesha Garaad Jaamac Garaad Cali, ayaa isna la filayaa in uu
manta oo Isniin ah soo gaadho magaalada Laascaanood halkaas oo loogu diyaariyey
soo dhawayn ballaadhan. Garaadadan ayaa ka qayb- galaya shir ay madaxda
dhaqanku ku sheegeen mid Aayo ka tashi ah oo lagu qaban doono Laascaanood kaasi
oo lagaga hadli doono xaaladda taagan iyo go’aamo ay sheegeen in laga qaadan
doono sida uu noqon doono xaalka Laascaanood mustaqbalka.
Wufuudda iska soo daba
dhacaya ayaa waxa mid walba la socda kooxo hubaysan oo maleeshiyaad ah kuwaasi
oo ay maamulka Gobolka iyo Guud ahaan waftiga Wasiirraduba ku tilmaameen kuwo
xaaladda xumaynaya haddii aanay odayaasha dhaqanku ka waantoobina ay tallaabo
qaadi doonaan.
Dorraad Sabtidii
Wasiirka Wasaaradda Arrimaha Gudaha Somaliland Maxamed Kaahin Axmed oo ah
madaxa waftiga golaha wasiirrada ee Laascaanood ku sugan ayaa saxaafadda u
akhriyay go’aano ay ka soo saareen shirka uu ku baaqay Garaad Jaamac Garaad
Ismaaciil waxaanu Wasiir Kaahin sheegya in ay ogol yihiin shirarka dhaqanka
haddii aanay ka hor imanayn qaddiyada Somaliland ee qaranimo taasi oo u muuqata
mid ay labada dhinac meel kala fog taagan yihiin.
Wasiir Maxamed Kaahin
Axmed waxa uu yidhi: "Golaha Wasiirrada ee jooga Gobolkan Sool, Guddoomiyaha
Gobolka, waxa ay soo saareen war-saxaafadeedkan. Guddoda ka kooban xukuumadda,
ee Degmada Laascaanood ee Gobolka Sool u joogta xallinta rabshadihii ka dhacay
mudaharaadkii dhacay waxaanu halkan kaga hadlaynaa qodobadan:
Xukuumadda
Jamhuuriyadda Somaliland iyada oo Tixgalinaysa Mabaadii’deeda oo ay bud-dhig u
tahay wada tashiga, wada xaajoodka, isla markaana aanu tixgalinayno,
war-saxaafadeedkii hore ee aanu soo saarnay kuna taariikhaysnaa 15-ka Bisha
Koowaad sannadkan 2023-ka oo dhigayay in xukuumadda Jamhuuriyadda Somaliland ay
ka go’an tahay in wada hadal lagu dhammeeyo wax kasta oo tabasho ah oo ka jira
Gobolka Sool. Sidaa darteed xukuumadda Jamhuuriyadda Somaliland waxa ay soo
dhawaynaysaa shir kasta oo dhaqan ay Beeshu qabsanayaan oo aan ka hor imanayn
jiritaanka Jamhuuriyadda Somaliland. Cid kasta oo ka tirsan maamul kale iyo
dawlad kale ururro kale oo siyaasadeed waxaa looga digayaa in aanay soo fara
galin xaaladda ka taagan Gobolka Sool iyo shirarka dhaqan ee Beesha uga socda
magaalo madaxda Gobolka Sool ee Laascaanood.