Ururka Rajo .

Urur Siyaasadeedka Rejo, isagoo ka mida saamilayda siyaasada qaranka Somaliland, waxa uu war-saxaafadeedkan kaga hadlaya 2 qodob oo qarankan ahmiyad wayn u leh, kolba sidii loo maareeyana guusha ama guul daradu ku imanayso.

Ugu horeyn urur Siyaasadeedka Rejo waxa uu aad uga werwer qabaa xaalada ay ku sugantay magaalada Laascaanood ee xarunta gobolka Sool. Urur Siyaasadeedka Rejo waxa uu la damqanaya oo la dareen yahay muwaadiniinta reer Somaliland ee daggan magaaladaa oo qax iyo barakac sinaba in ay usoo gaadho aanu rabin.

Waxa uu urur Siyaasadeedka Rejo usoo jeedinaya madaxwaynaha Jamhuuriyadda Somaliland in arinta Laascaanood laga balaadhiyo sida imika xukuumaddu uga hawl galayso oo talo iyo arin Qaran laga gaadho sidii reer Sool qadiyadooda indha caafimaad qaba loogu eegi lahaa. Waxa aanu madaxwayne kugula talinaynaa in aad iskugu yeedho golayaasha qaranka, Xisbiyada iyo ururada siyaasada ee qaranka, culimada iyo ganacsatada si talo Qaran halkaa ugasoo baxdo.

Qodobka 2-aad waa xidhiidhka Jamhuuriyadda Somaliland iyo dalka Maraykanka.

Sida aynu ogsoonahay wax heshiis ah oo laba geesood ah oo dhexmaray Somaliland iyo Maraykanku ma jiro. Waxase jirta qodobo Congress-ka iyo Senate-ka Maraykanku ku dareen Xeerka Difaaca qaranka ee loo yaqaano NDAA.

Qodobadaasi NDAA ku jira waxa ay ku yimaadeen, ka dib markii ay 2-da gole iyo wasaaradaha ariimaha dibada iyo ta difaaca ee Maraykanku isku af-garan waayeen Xeer Guddi hoosaadka ariimaha dibada ee Congress-ka iyo Senata-ku sanadkii hore curiyeen oo la yidhahdo Somaliland Partnership Act oo qeexayay aqoonsiga Somaliland ee Maraykanka.

Hadaba imika waxa muuqda in qodobadii ay 2-da wasaaradood iyo 2-da gole iskugu tanaasuleen ee Xeerka NDAA lagu daray ay wasaaradii ariimaha dibada ee dalka Maraykanku ganafka ku dhufatay hirgalintiisii sida ku cad warqadii uu soo saaray safiirka Maraykanka u jooga dalka Somalia ee Larry Andre oo si aan gabad lahayn u sheegay in Hargeysa Somalia ka tirsantahay, wixii ay ka qabanayaan meel walboo dalka Somalia ka tirsana xukuumada Federalka ee Somalia uga ruqsad qaataan.

Hadaba waxa uu safiir Larry Andre warqadiisa inoogu sheegay in tababarka milatari ee Berbera ku qabsoomaya Muqdisho ugasoo ruqsad qaateen, taasina waxa ay ka horimanaysa dastuurka Jamhuuriyadda Somaliland.

Waxa aanu sidaa daraadeed xukuumada Somaliland usoo jeedinayna in ay ilaaliyaan madax-banaanida qaranka Somaliland oo ay hakiyaan ama joojiyaan tababarka milatari ee qorshaysan bisha soo socda in uu Berbera ku qabsoomayo. Talaabadani waxa ay dood ka dhex abuuri doonta Maraykanka dhexdiisa waxa aanu hubnaana in ay la iman doonaan nidaam iyo dhaqan ay wasaarada ariimaha dibada ee Maraykanku ku saxayso khaladka ay inaga galayso.

Allah talada toosan ha ina waafajiyo.