Maxay Yihiin Qodobada Xukuumada Somaliland Ka Soo Saartay Xaalada Laascaanood?
Laascaanood (HWN) Wasiiradda
Somaliland ee magaalada Laascaanood u jooga xalinta qalalaasihii ka dhacay
magaalada, ayaa sheegay in xukuumadu diyaar u tahay in ay wada-hadal ku
dhamayso tabashada shacabka.
Wasiirada ayaa sheegay
in xukuumadu qaaday talaabooyin lagu sugayo amniga gobolka Sool, iyadoo
qaadatay bixinta magta dadkii dhintay, ayna xakamaysay ciidamada si khasaare
kale looga fogaado, isla markaana ay sii daysay dhamaan dadkii lagu soo qabtay
qalalaasaha.
Wasiirada ayaa sheegay
in ay taageersanyihiin baaqii kasoo baxay xubnaha golaha wakiilada, guurtida
iyo golayaasha deegaanada, ee magaalooyinka bariga, sida uu warbaahinta u
akhriyay Wasiirka Warfaafinta Somaliland Saleebaan Yuusuf Cali Koore.
Waxaanu
yidhi."Xukuumada Somaliland waxay taageeraysa baaqii ku saabsanaa adkaynta
nabadgalyada iyo in wada-hadal lagu dhameeyo, wixii tabasho ah ee jira, xubnaha
golaha wakiilada, guurtida iyo golayaasha deegaanada ee Taleex, Buuhoodle,
Laascaanood iyo Xudun"
Dadwynaha Laascaanood
ayay ugu baaqeen in ay nabada ilaaliyaan, sidookale, dadkii qaxay ayay ka
codsadeen in ay kusoo laabtaan magaaladooda, jaamacadaha, dugsiyada iyo
malcaamadaha Qur'aanka ayay sidookale, amreen in dib loo furo.
Waxay sheegeen in xukuumada
Somaliland ay ka go'antahay in ay wada-hadal ku dhamayso tabasho kasta oo
shacabku qabaan.