Laascaanood, - (HWN)- Waxa wali kacsan xaaladda magaalada Laascaanood ee caasimadda Gobolka Sool ee Jamhuuriyadda Somaliland iyada oo shalay mar kale maalintii 7aad dadweyne kacdoon samaynayaa isugu soo baxeen dhawr goobood oo magaalada ah kuwaasi oo markiiba ciidamada ammaanku kala dareeriyeen balse ku qaylinayay sida ay uga soo hor jeedaan dilalka qorshaysan ee magaalada Laascaanood ka dhacayay in muddo ah.

Wararkii ugu dambeeyey ee naga soo gaadhaya Magaalada Laascaanood waxa ay sheegayaan in xaaladdu mar kale shalay kacsanayd inkasta oo galinkii dambe iyo xalay xaaladdu nabad galyo ku soo laabatay haddana wali waxa kacsan xaaladda magaaladaasi waxaana markale shalay galinkii hore dib uga billowday dibadbaxyo ay dhigayaan qaar ka mid ah shacabka magaalada Laascaanood.

Dibadbaxayaasha ayaa ku qeylinaya erayo ka dhan ciidamada iyo dawladda Somaliland ee ku sugan halkaasi, waxayna dalbanayaa inay isaga baxaan magaalada. Balse dibad baxayaashaasi waxa si nabadgalyo ah u kala dareeriyey isu soo baxyadii shalay mar kale ka bilaabmay magaalada. Dhinaca kale xukuumadda Somaliland ayaa shalay  qaadday tallaabo kale oo ay doonayso in ay ku xakamayso xaaladda taagan, waxayna gebi ahaan hawada ka saartay khadka Internet-ka ee magaaladaasi, waxayna isku dayeysaa inay xakameyso xaaladda oo shalay markii dambe qabawday.

Ciidamada ammaanka ayaa gaaf wareegaya magaalada si ay u sugaan nabad galyada taasi oo keentay in ay dib u furmaan meheradaha ganacsigu iyada oo masaajidada iyo goobaha dadku isugu yimaad Bulshada loogu baaqayay in ay si xakameeyaan oo xaaladda la dejiyo iyada oo ay dhinaca kale magaalada ku sugan yihiin wasiirro iyo xildhibaanno ka tirsan golayaasha qaranka kuwaasi oo Gobolka Sool u jooga xasilinta ammaanka iyo sidii magaalada loogu soo dabbaali lahaa xaaladdeedii hore. 

Dhinaca kale waxa wali magaalooyinka Garoowe iyo Muqdisho laga abaabulayaa kacdoono iyo guubaabo lagu kicinayo shacabka Laascaanood oo ay kooxo gaar ahi doonayaan in ay shacabka Gobolka kaga hor keenaan xukuumaddooda. Kulamo lagu qabtay Huteello ku kala yaalla magaalooyinka Garoowe iyo Muqdisho kooxo abaabulan ayaa waxa ay ka wadaan abaabul ka dhan ah Somaliland iyada oo warbaahinta maamuladaasina si weyn u buunbuuninayaan xaaladda Laascaanood oo ay dunida ku tusayaan goob Somaliland xoog ku qabsatay.

Waxgaradka iyo aqoonyahanka gobolka qaar ka mid ah ayaa Xukuumadda Somaliland ugu baaqaya in looga baahan yahay in ay xaaladda dejiso si deg deg ahna wax looga qabto dilalka ku soo noqnoqda Gobolka ee ay sida dhuumashada ah u gaystaan kooxaha nabad diidka ah ee halista ku ah ammaanka iyo wada noolaanshaha shacabka Somaliland.

Foore