Maxaa Ka Jira In Ilhaan Cumar Loo Diiday In Ay Boosaaso Tagto?
Ilhaan Cumar, oo ka
tirsan aqalka wakiilada Mareykanka ayaa faahfaahin dheeraad ah ka bixisay safar
ay dhawaan ku tegtay deegaanada Puntland.
Ilhaan ayaa intii ay
halkaa joogtay, waxay la kulantay qaar kamid ah mas'uuliyiinta Puntland oo uu
kamid yahay madaxweyne Deni, odeyaasha dhaqanka iyo bulshada qeybaheeda kala
duwan, kuwaas oo ay kala hadashay arrimo kala duwan.
"Waxaan u imid in
Puntland soo booqdo wakhti badan baa iigu danbaysay, in qoyskaygii aan soo
booqdo, meelaha xaal u marayana aan waraysto.” Ayay Ilhaan BBC-da u sheegtay.
Ilhaan ayaa intii ay ku
gudo jirtey safarkeeda waxa ay la kulantay Madaxweynaha Puntland Siciid
Cabdillaahi Deni, wasiirrada, xildhibaannada iyo odoyaasha dhaqankaba qaar ka
mid ah.
Marka hore waxaan
weydiiyay waxa uu booqashadeeda daarnaa.
Dhawaan ayay ahayd
markii ay gaadhay magaalada Garoowe. Waxayna ahayd markii labaad ee ay halkaas
tagto tan iyo markii ay gashay siyaasadda maraykanka, gaar ahaan ay ku biirtay
Koongareeska.
Ilhaan waxay hore u soo
martay magaalada Nairobi oo ay kula kulantay qaar ka mid ah Soomaalida halkaa
ku nool.
Xildhibaan Ilhaan Cumar
oo ka tirsan Golaha Wakiilada Maraykanka ayaa been-abuur ku tilmaantay war la
faafiyey oo ahaa in laga hor istaagay
socdaal ay ku tegi lahayd Boosaaso.
Xildhibaan Ilhaan Cumar
ayaa waraysiga gaarka ah ee ay siisay BBC-da ku sheegtay in ay waxba kama
jiraan yihiin wararka ku saabsan in laga hor istaagay Boosaaso.
"Warkaas waxbo
kama jiro, waan xiisaynayay in aan Boosaaso tago se wakhtigaa aad iigu
yaraaday, waanan rajeynayaa in marka danbe ee aan soo laabto aan Boosaaso
gaadho" ayay BBC-da u sheegtay Ilhan oo ku sii jeeday Muqdisho.
Waa tuma Ilhan?
Ilhan waxay ku
guuleysatay kursiga gobolka Minnesota ee Kongreska bishii November 2016 markii
u horraysya, iyadoo noqotay mid ka mid ah labada hablood ee Muslimka ah ee ugu
horreeyay abid oo loo doortay aqalka Kongreska Mareykanka.
Qoyskeeda ayaa markii
hore yimid Mareykanka iyagoo qaxooti ah, waxayna noqotay haweeneydii ugu
horreysay oo xildhibaan ka noqoto Kongreska iyadoo xiran xijaab.
Waxaa horay loogu
eedeeyay falal Yuhuud-Naceyb ah kaddib markii ay ka hadashay Isra'iil iyo kooxaha
u ololeeyo dalkaas.Waxaa xitaa dhaliilay xubno ka tirsan xisbigeeda
Dimuqraadiga kadibna raaligelin ayay ka bixisay waxayna sheegtay "inay
qaadatay dhaleeceynta casharna ay ka baratay ".
Ilhan ayaa sidoo kale
ka hadashay falalka Islaam neceybka ah ee lagula kaco Muslimiinta, xili ay ka
falcelineysay hadal uu soo qoray xubin ka tirsan xisbiga Jamhuuriga isaga oo ku
dhajiyay sawir muujinaya daarihii Twin Towers oo gubanaya.
Booliska ayaa ku xiray
nin 55 jir ah gobolka New York, kaddib markii lagu eedeeyay inuu xafiiskeeda ku
dhajiyay sawir loogu handadayo dil kaas oo uu ku sheegay inay tahay
"argagixiso"
VOA