Waa Aftahan hadal cun ah. Waa dhaqan yaqaan ku dhashay aqal ay tallo taalo, kana dheregsan insaaniyadda iyo qiyamka  suuban.

Waa siyaasi gaadiiday oo leh khibrad afartan sanno ku dhow. Hadalkana kuma sariigto, waanu xanaf-tiraa ilaa xad oo wuxuu ka duullaa xikmadda ah: "LAFTA JABI XARAGANA HA KA TAGIN."

Wasiirka Warfaafinta ahna Afhayeenka Xukuumadda Jamhuuriyadda Somaliland, Saleebaan Yuusuf Cali Koore,  jawaabtii uu ka bixiyey  shalay baaqii Guddida Amniga Qaranka ee Soomaaliya, waxay ahayd mid u dan sheeg ah, mana ahayn digasho, sida dadka qaarkii ay uga bixiyeen fasiraada taban.

Waxay ahayd farriin uu ugu gudbinayey sida JSL jiidhku uga diiray Meydka dadka rayidka ah ee Qaraxyadu Solleen waaxyaha jidhkooda.

Doodiisuna waxay ku arooraysay dareen walaalnimo oo uu ku haaraamay madaxda Soomaaliya, sida aanay  masuuliyaddii loo baahnaa iskaga saarin inay dadkooda kala dabaashaan dhibka iyo safariirka laasimay.

Wasiir Koore wuxuu taabsiiyey Maamuleyaasha Soomaaliya, dayaca iyo debaca ka muuqda nabad ka aslaaxinta Soomaaliya iyo sida aanay ugu hagar bixin  Ummadda ay madaxda u yihiin.

Waxa kaloo, Afhayeenka Xukuumadda JSL uu ku dhaliilay Soomaaliya sababta dawladnimada ay ku baanayaan u horseedi weyday in shacbigoodu ka baxaan tawsta iyo hubanti la'aanta  ay keentay dawlad la'aantu.

Wasiir Koore wuxuu xusuustay Maahmaahdii ahayd; "Tiisaba Daryeelaa Tu kale ku dara," waana ta  uu isku barbar dhigay Qarannimada raasamaalka ah Somaliland iyo dawladnimada ribatay ee Muqdisho. Waxaanu ku guubaabiyey inay hantaan beylahdooda, oo ay u birmadaan  dhiiga shacbiga ee ququlaya shaaricyada Muqdisho.

Wasiirku wuxuu u caddeeyey Maamulka Muqdisho in madaxda Somaliland ku yimaadaan  doorasho qof iyo cod ah,isla markaana wixii lagu kala aragti duwan yahay lagu furdaamiyo xal ku dhisan  jid aanay saameyn  ku yeellan karin awoodo shisheeye oo cidhibteeda  ay ka naas-naasiyeen Soomaaliya.

Haddaba, waxa la yaab leh fadhi ku dirirka fasiraada khaldan baraha bulshada kaga bixiyey Hadalkii saafnaa ee Wasiir Saleebaan Yuusuf Cali Koore, oo dadka qaarkii ay u qaateen inuu ku diganayo dadkii ku dhintay Qaraxyadii toddobaadkii hore ka dhacay Muqdisho. Taasina waa mid aanay waxba ka jirin oo ihaano iyo qadaf ku ah insaaniyada. Mana ah wax ka suuro gala Wasiirka iyo Xukuumaddaba.

Waxaan Ilaahay uga baryaynaa Soomaaliya, inuu daadkooda u mooso, hase ahaatee ay yaqiinsadaan in aanay wax fursad ahi uga bannaanayn Somaliland oo ay dawlad ahaan u kala dhaqaajiyeen 1991kii.

W/Q: Cumar Maxamed Faarax