Hargaysa (HWN) Wasaaradda Deegaanka iyo Isbadelka Cimiladda Somaliland ayaa war ka soo saartay Shabeel dhawaan lagu dilay deegaanka Higlo oo ka tirsan Degmadda Salaxley ee Gobolka Maroodi-jeex.

Agaasimaha Waaxda Duur-joogta ee Wasaaradda Deegaanka iyo Isbadelka Cimiladda Cabdinaasir Xuseen Siciid oo u warmayey Wakaaladda Wararka Somaliland ee SOLNA ayaa sheegay in ciidanka boolisku ay gacanta ku soo dhigeen mid ka mid ah dadka ku eedaysan in ay dileen shabeelkaasi , kaas oo uu sheegay in aanu wax dhibaato ah gaysan , balse uu dhawaac fudud u gaadhsiiyey hal qof oo shacab ah markii ay dadka deegaanku weerareen.

Cabdinaasir Xuseen Siciid ayaa intaasi ku daray in ciidanka booliska ay ku dabo-jiraan eedaysanayaal kale oo door ku lahaa dilka shabeelkaasi, kuwaas oo uu sheegay in sharciga la marin doono, isagoo xusay in shabeelkaasi uu ka yimi dhinca waqooyi sida ay u xaqiijiyeen dadka deegaanku.

Agaasimaha Waaxda Duurjoogtu waxa uu bulshada Somaliland ugu baaqay in maadaama oo duur-joogtu ay tahay kheyraad dalku leeyahay in duurkeeda lagu ilaaliyo isla-markaana aan loo gaysan wax dhibaatada, qofkii arkay duur-joog la dhibaataynayaana uu ku wargaliyo maamulka ugu dhaw ee deegaanka uu jooga si talaabo looga qaado.