Xerada Qaxootiga Ee Dhadhaab Oo La Sheegay Inay Halis Ugu Jirto Xanuunka Jadeecada Iyo Daacuunka
Ururka dhakhaatiirta
aan xuduudda lahayn ayaa sheegtay Khamiistii in xeryaha qaxootiga ee Dhadhaab
ee dalka Kenya inay halis ugu jiraan inay ka dilaacaan xanuunka Jadeecada iyo
daacuunka, xilli kumanaan qaxooti cusub ahi ay soo gaadhayaan xeryahaas, kuwaas
oo ka imanaya Soomaaliya.
In ka badan 233,000 oo
qaxooti ah ayaa ku nool saddexda xero qaxooti ee aadka cidhiidhiga u ah.
Kooxda dhakhaatiirta
aan xuduudda lahayn ee loo yaqaano MSF, ayaa sheegay in tan iyo bishii January
ay aad kor ugu kacday dadka ka soo cararaya abaaraha, gaajada iyo xasaradaha ee
soo gaadhaya xeryahan.
Qaar badan oo ka mid ah
dadka cusub ayaa ka yimid koonfurta Soomaaliya, halkaas oo jadeecada iyo shuban
uu dhowaan ka dillaacay, sida ay sheegeen masuuliyiinta hay’adda MSF.
Ku xigeenka madaxa
barnaamijyada MSF u jooga dalka Kenya Andrian Guadarrama, ayaa khamiistii ka
sheegay Geneva, in qaar badan oo ka mida qaxootiga cusub ee soo gaadhay xeryaha
Dhadhaab, inay qaabileen dadkii hore ugu sii noolaa xeryahan, hase ahaate wuxuu
sheegay inay jiraan kumanaan kale oo ku nool hareeraha xeryaha, isla markaana
xaaladoodu ay aad u liidato.
Wuxuu sheegay in
toddobaadkii hore ay MSF diiwaangelisay illaa saddex xaaladood oo jadeeco ah
iyo laba qof oo looga shakisan yahay xanuunka daacuunka oo laga helay xerada
qaxootiga ee Dhagaxley.
Wasaaradda caafimaadka
Kenya ayaa todobaadkii hore soo saartay digniin ku saabsan xanuunka daacuunka
ka dib markii la xaqiijiyay 61 xaaladood oo illaa lix gobol ah.