Xaaladda Xabsiga Holcaya Ee Iran Ee Ay Ku Jiraan Siyaasiyiinta Iyo Ajaanibta
Dab xooggan ayaa ka
kacay xabsiga caanka ah ee Evin ee dalka Iiraan, kaas oo caan ku ah in ay ku
jiraan maxaabiista siyaasadda, saxafiyiinta iyo dadka ajnabiga ah.
Muuqaallo la soo
dhigay barta internetka ayaa muujinaya
holac iyo qiiq ka socda dhismahan ku yaala Tehran, waxaana la maqlayaa rasaas iyo qaraxyo.
Sarkaal ay soo
xiganeyso warbaahinta dowladda ayaa sheegay in xaaladdu ay dejiyeen, balse
muuqaallo laga soo duubay xabsiga ayaa u muuqday kuwo muujinaya dabka oo weli
sii fidaya.
Iran ayaa waxaa toddobaadyadii lasoo dhafay ka socday
dibadbaxyo looga soo horjeedo dowladda.
Waxay dibedbaxyadda
bilowdeen bishii hore ka dib markii haweeney 22-jir Iranian ah oo lagu
magacaabo Mahsa Amini ay ku dhimatay xabsiga booliiska.
Saraakiisha ayaa
sheegay in ay u dhimatay wadno xanuun, balse qoyskeeda ayaa arrintan ka biyo
diiday, iyaga oo sheegay in ay booliska anshaxa garaaceen.
Weriyaha BBC-da ee
Persian Rana Rahimpour ayaa sheegtay in aan weli la ogeyn in xaaladda
xabsiga ka jirto iyo mudaaharaadyadii dhawaan dalka ka socday
ay wax xiriir wada leeyihin. Si kastaba laga yaaba in wax xiriir iyaduna ka
dhexeyso sababto ah xabsiga waxaa ku xiran boqolaal qof oo dhawaan lagasoo
qabqabtay dibedbaxyadda.
Hase ahaate Warbaahinta
dowladda ayaa sheegaysa in labadan dhacdo aysan xiriir la lahayn, iyadoo soo xiganeysa sarkaal ku eedeeyay
"in dabka ay ka dambeyeen dambilayaal".
Muuqalo ay soo
bandhigtay kooxda dabagalka dowladda ee ayaa muujinaya dad ku dhawaaqaya
"dhimasho haku timado kaligii-taliye" – eraygan oo ka mid ah
hal-ku-dhigyada ugu muhiimsan ee dhaqdhaqaaqa mudaaharaadyada dowladda looga
soo horjeeday.
Fiidiyow kale ayaa u
muuqda inuu muujinayo walxaha qarxo oo xabsiga laga tuurayo, waxaana markaas la
maqlay qarax aad u weyn , sida ay sheegtay BBC Persian.
Warbaahinta Iran oo ay
si adag u maamusho dowladda ayaa sheegtay in rabshaduhu ay ka bilowdeen qolalka
ay ku jiraan maxaabiista loo soo xiray is daba marin maaliyadeed iyo
dambiilayaal sar sare ah, iyadoo dowladdu ay sheegtay in dibedbaxyaddu aysan ku
lug laheen maxaabiist arrimaha siyaassada
u xiran . wararku waxay intaasi ku darayaan in Siddeed qof ay ku dhaawacmeen
rabshadaha xabsiga ka dhacay.
Dhanka kale , Shalay oo
sabti ahayd Caro xooggan ayaa ka dhalatay muuqaal laga duubay ciidamada ka
hortaga rabshadaha ee dalka Iran, oo lagu baahiyay baraha bulshada, kuwaas oo
weerar ku saleysan faroxumeyn u geystay haweenay ka mid ah dadka ka qayb
qaadanayay dibadbaxyada ka socda dalkaasi, xilli ay ciidamadu isku dayayeen in
ay xiraan.
Dadka isticmaala baraha
internet-ka ayaa aad uga xumaaday falkaan, waxaana ay dalbadeen caddaalad,
iyagoo ku baaqay inuu is casilo taliyaha ciidamada booliska.
Inkastoo qaar ka mid ah
baraha bulshada dowladda ay xayirtay, haddana dadka reer Iran weli waxay
awoodaan in ay baraha bulshada ku wadaagaan sawirro kicinaya damiirka dadka oo
ku saabsan mudaharaadyada ka socda dalkaas.
Dalka waxaa gilgilay
qalalaase xooggan oo noqonaya kii ugu ba’naa muddo tobannaan sano ah.
Bannaanbaxyadan ayaa qaraxy bishii la soo dhaafay ka dib markii ay dadka ka
gilgisheen dhimashada gabar 22-jir ahayd oo ka soo jeedday gobolka ay deggan
yihiin dadka kurdishka ah ee Iran.
BBC