Haweeney 35 Jir Ah Oo Noqotay Hooyada Ugu Carruurta Badan Nigeria
Qaar ka
mid ah dadka ku nool gobolka Katsina ee ku yaalla waqooyi-galbeed ee wadanka
Nigeria ayaa billaabay inay ugu yeeraan haweeney lagu magacaabo, Hajara
Shucaybu, inay tahay haweeneyda ugu dhalmada badan dalkaas, iyadoo ay taasi ugu
wacan tahay tirada carruurta ah ee ay dhashay. Dhawaan waxay hooyadaas dhashay
shan carruur ah oo isku mar ah.
Haweenaydan
ayaa laba jeer ilmo mataano ah dhashay, kaddibna waxay ilmo dhashey sagaal jeer
oo markiiba mid kali ah, waxaana ay haatan umushay shan isku mar ah, taasoo
tirada guud ee ilmaha ay dhashay ka dhigeysa 18 caruur ah.
Mar ay
BBC-da kala hadashay dhalmada ilmaheeda, gaar ahaan shanteeda ilmood ee ugu
danbeeyay, ayaa waxay sheegtay inaysan jirin wax isbeddel ah oo ay dareentay
ama ay filaysay inay umuli doonto wax ka badan hal cunug.
Waxay
intaa ku dartay inaysan u tagin dhakhtar waligeed inta ay ilmaha uurka ku sido,
sidaas darteedna ay guriga uga dhaliyaan umulisooyin, kaddibna markii ay umusho
la geeyo isbitaalka guud ee Funtua, si loo hubiyo caafimaadkeeda iyo kan ilmaha
yar.
Haajara oo ah haweenay
xaas ah oo guriga uun iska joogta, oo
aan shaqo iyo ganacsi toona sameyn, ayaa waxay sheegtay inaanay jirin wax ay
samayso oo gaar ah iyo wax kale oo ay ku kacdo oo ay carruur badan sidaas ku
dhasho.
Waxay tiri, "Waa
awoodda Alle, ma cuno wax gaar ah, oo keenaya inaan dhalo ilmo badan."
Haweeneydan ayaa ka
codsatay dowladda iyo dadka kaleba inay ka caawiyaan sidii ay carruurta badan
ee ay dhashey u daryeeli lahayd.
Hase yeeshee, Seyga
haweeneydan, oo ah aabaha dhalay carruurtan, Shucaybu Umar, ayaa BBC-da u
sheegay in labo ka mid ah carruurta shanta ah ee hal mar dhashey, ay dhinteen
maalin kaddib dhalashadooda.
Laakiin saddexda soo
hartay, ayaa weli nool, balse waxaa la geeyay isbitaalka guud ee dowladda dhexe
ee Katsina, si ay hooyada ugu daryeesho.
Waxa uu sheegay in
isbitaalka guud ee Funtua aysan jirin dhalo lagu rido dhallaanka dhiciska ah,
sidaas awgeedna hadda loo diray xarunta dowladda dhexe ee Katsina, oo ay ka
heleen daryeelkii ay u baahnaayeen.
Shucaybu, oo ka mid ah
dadka beeraleyda ah ee ku nool tuulada Doma ee gobolka Katsina, ayaa sheegay in
carruurta uu u arko hadiyad iyo naxariis xagga Eebbe ka timid.
Laakiin waxa uu
dhankiisa sheegay in aysan jirin cunto gaar ah oo ay xaaskiisu qaadato, ama wax
ay samayso oo ka dhigaya inay carruur badan dhasho.
Ninkan ayaa sheegay in
guddoomiyaha dawlada hoose ee Faskari ee gobolka Katsina nuu ku caawiyey lacag
dhan 100 kun oo lacagta Naira ah, balse ay weli u baahan yihiin in laga caawiyo
dhanka daryeelka qoyska.
Cumar Xuseen, oo ah
aabbaha dhalay Hajara, ayaa sheegay in gabadhiisu guursatay 21 sano ka hor.
"Hajara waa 35 sano
jir, waxay xaas ahayd 21-kii sano ee la soo dhaafay, marka loo eego tirada ay
dhashay, waxaan oran karaa waa deeq Alle,” ayuu yiri Cumar.
Mar ay BBC-da weydiisay
Hajara inay mar kale dhali doonto mustaqbalka, ayaa waxay sheegtay in xaaladdu
aanay gacanteeda ku jirin, Ilaahayna uu wax walba hayo. "Haddii uu
go'aanka ka ahaado dhanka Alle, inaan mar kale dhali doono, waan umuli
doonaa," ayey tiri.
Haweeney dhashey 17
caruura oo dooneysa iney kuwo kale dhasho
Dhanka kale, waxaa
horey u jirtay haweeney ilmo tiro badan dhashey dalka Nigeria, taasoo dhashey
17 caruur ah.
Haweeneydaasi waxaa la
yiraahdaa, Jummai Ibrahim, oo ah haweeney ku nool gobolka Kano. Waxay hal tiro
ka hooseysaa haweeneyda haatan taariikhda cusub dhigtay, Hajara.
Waxay BBC-da u sheegtay
inay weli doonayso inay dhasho carruur ka badan 17-kii ay dhashay, sababtoo ah
bay tiri, "carruurtu waa nimco xagga Eebbe ka timid."
Haweeneydan ayaa sidoo
kale xustay inay ku faaneyso tirada carruurta ay dhashay.
Si kastaba ha ahaatee,
waxay sheegtay in hal shay oo ay tahay inay dadku ogaadaan uu yahay inaysan
carruurta si caadi ah u dhalin, oo qalliin lagu sameeyay.
BBC