Sarkaal Sare Oo Maraykan Ah Oo Dalkiisa Ugu Baaqay In Uu Joojiyo Iskaashiga Uu La Leeyahay Sucuudiga
Guddoomiyaha Guddida
Arrimaha Debedda ee Golaha Senateka Maraykanka, Robert Menendez ayaa Isniintii
ku baaqay in la hakiyo dhammaan iskaashiga Maraykanku uu la leeyahay dalka
Sucuudiga, isaga oo si adag u muujinayey, sida Maraykanku uu uga cadhooday
tallaabadii uu Sucuudigu qaaday, ee fursadda dhaqaale siinaysay dalka Ruushka.
Bayaan uu soo saaray
Senator Menendez ayuu ku baaqay inaan wax hub ah laga iibin dalka Sucuudiga,
isla markaana in la joojiyo iskaashiga amni ee ka dhexeeya labada dal, marka
laga reebo arrimaha lagama maarmaanka u ah danaha Maraykanka iyo difaaca amniga
qaranka. Maraykanka iyo Sucuudiga ayaa in ka badan 70 sannadood ah waxaa ka
dhexeeya iskaashi dhinaca amniga ah iyo weliba heshiis dhinaca ganacsiga hubka
ah.
Guddoomiyaha guddida
arrimaha debedda ee golaha Senate-ka Menendez, ayaa ka tirsan xisbiga
Dimoqraadiga, waxaana laga soo doortaa gobolka New Jersey. Wuxuu wacad ku maray
"inaanu taageeri doonin nooc kasta oo ah, iskaashi lala yeesho Riyadh, illaa
inta uu Sucuudigu dib uga qiimaynayo mowqifkooda ku saabsan dagaalka Ukrine”
wuxuuna hadalkiisa sii raaciyey "intaas ayaa nagu filan”
Hadalka Senatorka ayaa
ku soo beegmaya, iyada oo afar maalmood ka hor uu ururka ay ku bahoobeen
dalalka soo saara saliida ee OPEC+ oo ay hoggaaminayeen Sucuudiga iyo Ruushku
ay ku heshiiyeen in la dhimo illaa 2 milyan oo foosto maalintii shidaalka ay
soo saaraan.
Tallaabadan hoos loogu
dhigayo wax soo saarka shidaalka ayaa waxay keenaysaa, in qiimaha shidaalku uu
cirka isku shareero, taas oo keenaysa in dalka Ruushku inuu shidaalkiisa ku
iibiyo qiime sarreeya. Macaashka uu ka helo shidaalkaasina, uu ka caawiyo
madaxweyne Putin, inuu helo dhaqaale uu ku bixiyo, dagaalka uu ka wado dalka
Ukraine.
Sidoo kale hoos u
dhigista wax soo saarka shidaalka ayaa dhaawacaysa dedaalada uu wado
isbahaysiga uu hoggaaminayo dalka Maraykanku, kuwaas oo doonaya, inay
curyaamiyaan dhaqaalaha Ruushka, si aanu u sii awoodin inuu sii wado dagaalka
Ukraine, iyada oo dhinaca kalena halis gelinaysa, siyaasadaha madaxweyne Joe
Biden iyo xisbigiisa, haddii qiimaha shidaalku uu sare kaco, xilli dalka
Maraykanku uu bisha soo socota u dareerayo doorashada xilliga dhexe.
VOA