Tahriibeyaal Soomaali Ah Oo Ku Dhintay Badda Giriigga
Ugu yaraan 22 qof oo
Soomaali ah oo u badan dumar ayaa lagu soo warramayaa inay ku dhinteen xeebta
dalka Giriigga, kaddib markii ay qallibantay doon ay saarnaayeen.
Dadka dhintay ayaa u
badan gabdho da’dooda lagu qiyaasay inta u dhaxeysa labaatan ilaa soddon iyo
afar sano jir.
Meydadka la helay waxaa
sidoo kale ku jira wiil dhallinyaro ah oo da’adiisa lagu qiyaasay 15 sano jir
iyo nin oday ah.
Doonta qallibantay
waxaa la socday muhaajiriin isugu jira Soomaali iyo ajaaniib. Waxay ka soo
baxday dalka Turkiga, gaar ahaan gobolka Izir, waxayna ku sii jeedday Giriigga.
Jaaliyadda Soomaalida
ee Giriigga ayaa noo xaqiijisay in shilka uu dhacay Khamiistii, isla markaana
ay la soo xiriireen ehelada dadkii ku dhintay shilkaas.
Waxa ay intaas ku
dareen in meydadka lagu hayo jasiirad ku taalla Giriigga, isla markaana uu
maamulka halkaas ka jira amray in la helo eheladooda inta aan la aasin ka hor.
Tirada dadka ka
badbaaday shilka ayaa lagu qiyaasay 15 ilaa 6 qof, kuwaas oo lagu hayo xero
jasiiradda ku taalla.
Maxaa
sababay shilka dooonta?
"Markii ay doonta
sidday muhaajiriinta u soo dhowaatay xeebta Giriigga, ayay raggii ka boodeen oo
ay isku tuureen badda si ay berriga u tagaan, waxaana ku soo haray gabdhaha oo
keliya. Intii saarnaydna hal dhinac ayay u bateen, taas oo sababtay in culeyska
doonta uu dhinac u bato, sidaasna ay ku qallibanto,” ayuu yiri Cabdiraxmaan
Cali Xaaji (Sokor), oo ka mid ah xubnaha jaaliyadda Soomaalida ee Giriigga oo
wareysi siiyay BBC Soomaali.
Waxaa lagu soo
warramayaa in la aqoonsaday qaar ka tirsan meydadka.
Shuruudaha looga baahan
yahay ehelada iyo qaraabada
"Ehelada iyo qaraabada
waxaa la eegayaa xiriirka kala dhaxeeya qofka dhintay, waxaana la doonayaa qof
aad ugu dhow qofka dhintay,” ayuu yiri Cabdiraxmaan Cali.
"Dadka qaar ee aan
wadan dukumiintiyada rasmiga ah ee halkan soo gaaray, waxaa la weydiistay in
laga qaado dheecaanka hidde-sidaha ah ee DNA," ayuu sii raaciyay.
Sanadkii 2016, waxaa la
gaaray heshiis uu Turkigu ku oggolaanayo inuu joojiyo in muhaajiriinta uu u
oggolaado inay galaan Yurub, taas beddelkeedana loogu deeqo dhaqaale uu ku
maamulo qaxootiga badan ee dalkaas tagaya.
Bishii Febaraayo ee
sanadkan 2022, shan qof oo Soomaali ah ayaa qabow ugu dhimatay xadka Turkiga
iyo Giriigga.
Tirada tahriibeyaashaas
waxay ahayd 12 qof.
Turkiga ayaa ku
eedeeyay saraakiisha xudduudaha ee dalka Giriigga in ay tahriibeyaashaasi dib
ugu soo celiyeen xudduudda, taas oo sababtay in ay qabow u dhintaan.
Giriigga ayaa isna
dhankiisa ku gacan seyray eedeymahaas.
Labada waddan ee ku
yaalla badda Mediterranean-ka, ayaa marar badan isku maan-dhaafay xaaladda
muhaajiriinta ka soo talaabaysa xudduudaha dhanka dhulka iyo badda ee ay
wadaagaan.
Giriigga ayaa marin u
ah qaxootiga iyo muhaajiriinta ku wajahan qaaradda Yurub.
BBC