Hargeysa,- (HWN)- Xildhibaan Maxamed Abiib Yuusuf oo ka tirsan Xildhibannada Golaha Wakiillada Somaliland ayaa si adag uga hadlay xaaladda Khilaafka siyaasadeed ee dalka ka taagan gaar ahaan khilaafka u dhaxeeya xisbiyada Mucaaridka oo dhinac ah iyo xisbul Maxaafidka iyo xukuumaddiisa oo dhinaca kale ah isaga oo Xildhibaanku sheegay in degdeg loogu baahan yahay in go’aan midaysan laga gaadho oo aan dalku sidan ugu sii kala qaybsanaan khilaafka doorashada.

Xildhibaan Maxamed Abiib Yuusuf oo ka hadlayay fadhigii Golaha Wakiillada Somaliland ee dorraad ayaa waxa uu ka hadlay khilaafka siyaasadeed, Masuuliyadda Golaha Wakiillada iyo arrimo kale waxaanu yidhi sidan: "Imika innagu tusaale ahaan doorasho ayaan galnay. Golaha wakiillada iyo Deegaanka ayaan ku galnay. Xeerkee qorayay bal hadda ii sheega. Sharcigeebuu Madaxweynuhu fulinayay. Heshiis saddexda xisbi galeen buu ahaa. Siyaasad baa lagaga heshiiyay xeer ay ku qornaydna ma jiro. Maantana waxaan qabaa in la heshiin karo oo dhinacyda axsaabta siyaasaddu heshiin karaan. Waxa aan madaxweynaha Somaliland u soo jeedinayaa iyo dadka kale ee siyaasadda saamaynaya ee ay khusayso in aan lagu murmin sharci baa dhigaya. Sharciga aan la jabin Karin ee aan la baal marin Karin ee aan waxba laga baddali Karin waa Qur’aanka kariimka ah ee xagga Rabbi ka ahaaday. Sidoo kale Xadiiska Rasuulka marka laga yimaad wixii kale oo dhan innaga ayaa leexleexsan karna oo kolba sida aan doono ka dhigan karna. Haddii aynu ku heshiinno wax alla waxa doorasho ahna hal maalin aan wada qabano sida Kenya oo kale waan leenahay oo waan karnaa. Laba aan isa saarno haddii aan leenahay waan leenahay laakiin heshiiska siyaasiga ah ayaa muhiim ah iyo wixii hadba lagu heshiiyo.”

Intaa kadib Xildhibaan Maxamed Abiib Yuusuf waxa si adag uga hadlay xaaladda Golihiisa Wakiillada oo uu dhaliilo u soo jeediyey waxaanu yidhi: "Goleheenu waa in uu iska daayaa shirarka iyo kala kooxaysiga. Maalinta dano kale dibadda innaga soo galaan Golaha toddobaatan, Toddobaatan iyo shan Toddobaatan iyo Lix ayuu isku taagayaa waar inaadeer maalinta lagu soo amro waxaaba ka muhiimsan adiga oo ka sarreeya cidda ku soo amartay oo dadbaa ku soo doortee sidee laguu amri karaa. Sidee laguu odhan karaa maanta Golihii tagoo hebel sii daa sidee laguu odhan karaa. Ma waxa aynu noqonnaa dad ku raaxaysta duuduub baa lagu ansixinayaa. Waa lagu heshiiyey berri orda oo golihii waxaa ka dhaha. Ma waxaasay shaqadeenu noqotay. Ma noqon karayso Ilaahayna waa ku waydiinayaa. Golaheena waxaa lagu raaxaystaa habeenka la yidhaa nin hebel baa waxaa wata. Habeenkaasi ayaa lagu wareerinayaa. Laba Milyan oo taleefan kugu soo dhacaya. Amxamed Abiibow soo kallah, soo carar berri kaalay, ninkii mala heshiisay ninkii ma dhammaynay. Waar orod oo naga tag. Anigu waxaan ka helaa laguma heshiin, waa laga doodayaa. Way sii soconaysaa dooddu berribaa qodob qodob baa loogu codaynayaa. Maalinta la yidhaa duuduub baa lagu ansixinayaa qalbiga ayaa I xanuuna”. Ayuu yidhi Xildhibaan Maxamed Abiib.