Xisbiga WADDANI Oo Si Adag Uga Jawaabay Hadal Ka Soo Yeedhay Muuse Biixi
Hargeysa, -(HWN)-
Madaxweynaha Somaliland Muuse Biixi Cabdi, ayaa sheegay in saddexda xisbi ee
Kulmiye, WADDANI iyo UCID, uu wakhtigoodi dhamaaday oo ay yihiin xisbiyo kumeel
gaadh ah, isla markaana ay tartanka ka hadhayaan haddii aanay sharciyadooda
keenin 28 bishan aynu ku jirno ee sagaalaad, maalintaasi oo maalmo koobani
innaga xigaan. Waxaana hadalkaasi Madaxweynaha isla shalayba ka jawaabay
xisbiga Mucaaridka ah ee WADDANI Mudane Khadar Xuseen Cabdi oo madaxweynaha shari
jabin ku eedeeyey.
Madaxweynaha oo ka
hadlayay xaflad qalin jabin ah oo loo qabtay arday ka baxday Jaamacada
Timacadde ee magaalada Gabilay, ayaa sheegay in xisbigii aan sharciyadiisa soo
xerayn 28 bishan Sagaalaad 2022, uu ka hadhayo tartanka oo saaxada ka baxayo
sidii ku dhacday xisbigii mudada dheer talada Somaliland hayay ee UDUB.
Madaxweynaha Somaliland
oo hadalkan xafladda ka jeedinayay waxa uu yidhi: "Saacadaa aanu joogno waxaanu
nahay xisbiyo kumeel gaadh ah, saddexda xisbi waxa laga rabaa bishan aynu ku jirno 28 keeda in ay keenaan
sharciyadoodii oo dhan, dhismahoodii, guddidii fulinta, golihii dhexe, xeerka
ay ku kala baxaan, xisbigii keeni waayaa halkaasuu ku hadhayaa, sidii xisbigii
udub waana sharci"
Madaxweynuhu wuxuu kasoo
horjeestay soojeedintii guddida ganacsatada, isaga oo sheegay in aanay suuragal
ahayn in laysku sidko doorashooyinka madaxtooyada iyo urrurada, waxa uu sheegay
in marka hore la dooranayo saddex xisbi kadibna ay madaxweyne u tartami
doonaan.
Madaxweynuhu waxa uu
sheegay in xisbiyada muucaaradka ay isku hayaan urrurada hala furo iyo yaan la
furin, iyo haddii la furo yaanay galin doorashada madaxweynaha iyo ha galaan,
isaga oo sheegay in aanu ka baqanayn in uu tartan la galo WADDANI iyo UCID.
Waxaanu yidhi."Qodobka
ay maanta aad uga damqanayaan waxa weeyaan urrurada yaan la furin, haddii la
furana tartanka madaxweynaha yaanay ka qaybgalin, haddaanu cid siyaasad isku
hayno, haddii aan cid ka baqanayo oo aan leeyahay yayna kula tartamin Gaboose
iyo Axmed Ismaaciil Samatar ayuunbaan iska fogayn lahaa"
Waxa uu sheegay in aan
madaxweyne fiican la helayn, haddii aan xisbiyo fiican la helin, sidaa
daraadeedna waxa uu sheegay in loo baahanyahay in xisbiyo lasoo saaro, oo sidaa
taladii kusoo urrurtay.
Dhinaca kale Xoghayaha
Guud ee Xisbiga Mucaaridka ah ee WADDANI Mudane Khadar Xuseen Cabdi oo ka
jawaabayay hadalkaasi Madaxweynaha ayaa yidhi: "Maanta waxa run ah in
Madaxweynaha Somaliland fashilmay. In uu ku fashilmay in uu dadka mideeyo. In
uu ku fashilmay in uu shuruucda dalka ilaaliyo. In uu ku fashilmay in uu dalka
doorashooyin ka qabto. In uu ku fashilmay in uu dalka sumcaddiisii dibadda
ilaaliyo. Maanta Madaxweynaha Somaliland Muuse Biixi wakhtigii sharciga ahaa ee
la doortay waxa uga dhiman wax ku siman 61 maalmood. Waxa kale oo xaqiiqo ah in
aanay jirin duruuftii dastuurku fasaxayay ee muddoda madaxweynaha loogu
kordhinayay. Marka madaxweynuhu maanta doono muddo kordhin waxa uu dunida
farriin ahaan ugu dirayaa waa Somaliland amni maaha. Maadaama dastuurka Somaliland
hal qodob oo kali ah uu ku sheegayo muddo kordhin Madaxweynaha loo sameeyo oo
ku iman karta dalka oo Nabad galyo darro ka dhaco taasina in ay jirto iyo in
aanay jirin umadda ayaa arkaysa. Sharciga Madaxweynuhu maalin walba ku sheego
in uu ilaaliyaa waxa la is waydiin karaa halkee ku yaallaa. Sharcigee
Madaxweynaha u ogolaanaya in uu marna isu baddalo guddidii doorashada, mar uu
isagu noqdo guddidii diiwaan galinta, shalay waxa uu madaxweynuhu yidhi 28-ka
Bishan xisbigii soo gudbin waaya waxa laga rabo waxa uu ka hadhayaa doorashada.
Su’aasha is waydiinta lihi waxa ay tahay halkee ku yaallaa muddodaasi
dhammaadka ahi. Madaxweynuhu ma isaga ayaa guddidii diiwaan galinta Noqday. Ma
isaga ayaa maxkamadihii noqday ma isaga ayaa baarlamankii noqday”. Ayuu yidhi
Xoghayaha Guud ee Xisbiga Mucaaridka ah ee WADDANI Mudane Khadar Xuseen Cabdi.