Guddoomiyaha Golaha Wakiillada Somaliland Cabdirisaaq Khaliif Axmed, ayaa sheegay in Golaha Wakiilladu u ansixiyeen Xubnihii ka hadhsanaa Komishanka doorashooyinka Somaliland, si aan dib u dhac dambe oo ku yimaada arrimaah doorashooyinka aan Golahooda wax looga saarin.

"Waxan soo jeedinayaa in Xubnahan Komishanka doorashooyinka si wada jir ah hawshooda u dhamaystiro, si ay u guddo galaan hawshii u taalay Komishanka doorashooyinka Qaranka oo aan dib u dhac dambe, oo Golaha Wakiillada wax laga saaro aanay u iman.” Ayuu yidhi Guddoomiye Cabdirisaaq Khaliif.

Guddoomiyaha Golaha Wakiilladu waxa uu sheegay in looga baahan yahay Xubnaha komishanka doorashooyinku in ay caddaalad iyo si waafaqsan xeerarka iyo Distuurka dalka u gutaan shaqada culus ee horyaala, waxaanu yidhi "Waxa aan rajaynayaa in xubnahaas Komishanka ee aynu codka siinay maanta in ay xilkooda u gudan doonaan, si waafaqsan xeerarka, shuruuda dalka iyo Distuurka qaranka. Waxa aynu ka filaynaa waa caddaalad iyo garsoor ay u sameeyaan dhamaan tartamayaasha iyo asxaabta qaranka ama Ururada tartami doonta.”