Ruushka Oo Markale Tubbooyinka Gaaska Ka Xirtay Waddamada Yurub
Ruushka ayaa gabi
ahaanba joojiyay gaaskii uu ka siin jiray waddamada Yurub isagoo sheegay in loo
baahan yahay in dayactir lagu sameeyo dhuumaha shidaalka.
Shirkadda tamarta ee
dawladda Ruushka, ee Gazprom, ayaa sheegtay in hakinta dhuumaha Nord Stream 1
ay socon doonto saddexda maalmood ee soo socda.
Ruushka ayaa horey si
weyn hoos ugu dhigay dhoofinta gaaska ee dhuumaha.
Moscow ayaa beenisay
eedeymaha inay tamarta ay u adeegsatay sida hubka dagaalka kaas oo ay uga
go’leedahay inay ku caburiso wadamada reer galbeedka
Dhuumaha Nord Stream 1
waxa uu dheererkoodu gaaraya 1,200 kilomitir oo ka soo bilaaneyso xeebta
Ruushka ee u dhow St Petersburg ilaa waqooyi bari ee Jarmalka.
Waxa la furay sannadkii
2011-kii, waxaana maalin walba mara gaas cadadiisu gaareyso ilaa 170 milyan oo mitir kuyuubik.
Dhuumaha ayaa la xiray
10 maalmood bishii Luulyo markaasi oo uu sidoo kale Ruushku sheegay in la
dayactiri doono waxaana dhowaanba dhuumaha marayay gaas boqolkiiba labaan ah
marka loo eego gaaskii maalin laha ee mari jiray. Wuxuu ku sababeeyay inay
dhuumaha ay wax ka khaldan yihiin.
Mamulaha guud ee
shabakadaha Jarmalka ayaa sheegay in waddankiisa uu sii adkeysan karo 3-da
maalmood ee uu Ruushka hakiyay gaaska laakiin waa haddii uu dib u bilaabo
keenista maalmaha soo socda.
"Waxaan u
maleynayaa inaan awood u yeelan doonno inaan la qabsano," Klaus Mueller
ayaa sidaasu u sheegay Reuters. "Waxaan ku kalsoonahay in Ruushka uu ku
soo celin doono 20% gaaska maalinta Sabtida ah, laakiin cidna ma xaqiijin karto
taas."
Hogaamiyayaasha Yurub
ayaa ka cabsi qaba in Ruushku uu kordhiyo muddada uu qabsaday isagoo isku
dayaya inuu sare u qaado qiimaha gaaska, kaas oo horeyba aad kor ugu kacay
sanadkii la soo dhaafay.
Si kastaba ha ahaatee,
lama filayo in ku dhawaaqista maanta ay saameyn ku yeelato qiimaha isla
markaaba.
Qiimaha gaaska
dabiiciga ah ee UK ayaa runtii Arbacadiii hoos u dhacay in ka badan 15%
suuqyada.
Tallaabadan ayaa waxay
abuureysaa dhibaato nololeed oo qaali ah gaar ahaan bilaha qaboobaha ee ku soo
aaddan Yurub, taas oo ku qasbi karta dawladaha in ay balaayiin doolar ku
bixiyaan si ay culayska u yareeyaan.
Talaadadii, wasiirka
tamarta ee Faransiiska Agnes Pannier-Runacher ayaa ku eedaysay Ruushka "in
uu gaaska u isticmaalayo sida hub dagaal".
Waxay hadalkaan
sheegtay kadib markii shirkadda Gazprom ay shaacisay inay joojinayso gaaska ay
siiso shirkadda tamarta Faransiiska ee Engie.
Laakiin afhayeenka
madaxweynaha Ruushka Vladimir Putin ayaa diiday eedeymaha - wuxuuna ku
adkeystay in cunaqabateynta reer galbeedka ay sababtay hakadka iyadoo
dhaawaceysa kaabayaasha Ruushka.
Waxa uu ku adkaystay in
"dhibaatooyinka tignoolajiyada" ee ay cunaqabatayntu horseedday ay
tahay waxa kaliya ee ka hor istaagaya Ruushka in uu gaaska mariyo dhuumaha,
balse wax faah-faahin ah kama uusan bixin waxa dhibaatadu ay tahay.
BBC