BOOSAASO: Nabaddu Waa Macaan Tahay
Marka hore waxaan ka tacsiyadeynayaa dhammaan dadkii ku dhintay shaqaaqadii ka dhacday magaalada Boosaaso, kuwa dhaawaca ahna EEBBE ha caafiyo.
Ciidamada ku dagaalamay Boosaaso waa walalo, ehel, gacal iyo sokeeye, khilaafkooda naxdin ayuu ku yahay Ummadda reer Puntland, marna kalama tagayaan, waxay yihiin oo ahaan doontaan difaacayaasha sharafta dalkeena iyo dadkeena.
Qof kasta oo damiir fayow lihi wuu ka damqanayaa wixii dhacay, qof walba oo hurinteeda iyo iska horkeenkeeda ka shaqeysana marna lama hilmaami doono.
Puntland waxaa ka socda horumar iyo koboc dhinac walba taabanaya, dagaalka iyo dhiba ayaa lid ku ah marwalba xasiloonida ka dhalata Nabadda.
Dhammaanteen Waxaa na saaran masuuliyadda ka talinta xasiloonida dalka iyo ka hortaga wixii dhibaato ku ah, si aynu xooga u saarno Danta-guud taas oo ah dhaxal waara oo aanu uga tagteyno ubadkeena iyo kuway sii dhali doonaan Haddii Alle idmo.
Waxaan ku baaqayaa in si nabad-gelyo ah lagu xaliyo dhammaan wixii ka dhacay Boosaaso, Dawladda Puntland waxaa saaran masuuliyad gaar ah, waana inay guddi u saarta wixii shalay dhacay.
Dunida waxaa ugu wanaagsan qofka Nabadda xambaarsan, waxaana ugu aaya-xun qofka colaadda huriya.
Nabaddu waa macaan tahay!!!!
AFEEF:
Hadhwanaagnews marnaba masuul kama aha Aragtida dadka kale. Qoraaga ayaa xumaanteeda, xushmadeeda iyo xilkeeda sida. waxa kaliya oo Hadhwanaagmedia dhiirigalinaysaa, isdhaafsiga aragtida, canaanta gacaliyo talo wadaagga!