Markuu SNM ahaa waxaa ku shaqaysan jirtay saraakiisha Galbeedka oo mucaarid ku ahaa Guddoomiyii SNM ee ugu muddada dheeraa ee Axmed Siilaanyo, isagoo markaas ka tirsanaa garabkii Calancasta loo yaqaanay.

Markii uu kulmiye ku biirayna wuxuu afkiisa ka yidhi, waxaan ugu biiray si aan lay oran abtigii Cigaal ayuu ka soo horjeeday ee Udub mabda' kuma aannu diidanayn.

Kolkii danbe ee Siilaanyo xukunkii ku guulaystay waa kii mar kale haddana Ina Biixi daba nashleeyey ee u dhaga dhagayn jiray galdaloolooyinka Xukuumadda, una sameyn jiray khiddooyinka iyo shaqooyinka Muuse iskala hanka weyn yahay (his dirty jobs).

Maantana waxuu u qabto cod bixiyaashiisa  (constituency) ha joogtee,  juhdigiisa u weyn wuxuu geliyaa la dagaallanka Xirsi & Xaashi, isagoo mar kale abbaan (foot soldier) u ah Ina Biixi.

Maxamed Kaahin Axmed Ildab jilibka uu ka soojeedo, oo aannu isku deegaan iyo ceeshow milix nahay, wuxuu ahaan jiray laf dhabarta beel weynta Habar Jeclo; marka loo eego faraha, dhiiranaanta, haybadda, hanka sare & dhaqalaahaba.

Maanta se deegaannadoodu waa kuwa ugu dib-u-dhacsan dhan kasta oo loo eegaba. Waxaana eedda koobaad leh Maxamed Kaahin oo budhtuure u ah soddon sannadood, laakiin aan bilaale u cadayn, oo nasiibdarro noqday awr dad kale rarto oo u ciidamiya cid kale.

Kuwo ayaa ku dooda wuxuu noqonaya Guddoomiyaha Kulmiye, oo dabadeed madaxweyne ayuu uga sii dallacayaa! Ha yeeshee doodaasi waa mid aan waaqiciga ku fadhiyin, caqli ahaanna aan la sababayn karin (illogical).

Waayo, kow, isaga ayaaban hankaa lahayn run ahaantii. Laba, dhaqaallaheedii ma hayo (cid maalgashanaysaana ma muuqato). Dabcan da'diisu na uma  saamaxayso marka loo eego duruufaha ku xeeran iyo kalkiisii oo aanay ahayn.

Runtu ma fantaa?

Abdirasaq Mohamud

[email protected]