Madax-Dhaqameedka Beelaha Subeer Awal & Garxajis Oo Guddi Iska Dhex Doortey Iyo Ajandayaasha Qarsoon
Hargeysa, - (HWN)-
Madax-dhaqameedka Beelaha Subeer Awal iyo Garxajis oo kulankoodii labaad shalay
isugu yimid Huteel ku yaalla caasimadda Somaliland Hargeysa ayaa ka wada hadlay
xaaladda siyaasadeed iyo amni ee dalka kadib khilaafka ba’an ee ka dhex taagan
xisbiyada Mucaaridka ah iyo Xukuumadda Madaxweyne Muuse Biixi Cabdi.
Kulanka labaad ee
shalay dhex maray Madax-dhaqameedka ka kala socday labadan beelood oo ay kala
hogaaminayeen Suldaanka Guud ee Beelaha Subeer Awal Suldaan Xasan Suldaan
Cabdillaahi Suldaan Cabdiraxmaan iyo Suldaan Axmed Cismaan Caddo-Gude oo
matalayay Madax-dhaqameedka Beelaha Garxajis ayaa waxa ay muddo saacado ah oo
kulankaasi socday isla jeexjeexeen xaaladdii ugu dambaysay ee Khilaafka cakiran
ee ka taagan Somaliland iyo sidii ay door muuqata Madax-dhaqameedka labadan
beelood uga qaadan lahaayeen xal u helidda khilaafka siyaasadeed oo ay horeba
labadan dhinac ugu tilmaameen mid halis weyn ku ah wada jirka iyo amniga
qaranka kaasi oo u baahan in xal kama dambays ah loo helo.
Kadib falanqayn iyo
doodo dhaadheer oo labada dhinac yeeshaan, waxa ugu dambayn madax-dhaqameedka
labadan beelood isla qaateen in ay iska dhex doortaan Guddi ka kooban 20
xubnood oo isugu jira labada dhinac kuwaasi oo loo xil saaray in ay ka wada
shaqeeyaan sidii looga bixi lahaa khilaafka cakiran ee hadheeyey guud ahaan
dalka kaasi oo ku saabsan doorashooyinka Jamhuuriyadda Somaliland.
Ilo-wareedyo u dhuun
daloola shirkan labaad ee shalay degmada Maxamuud Haybe ee Caasimadda Hargeysa
ku dhex maray Madax-dhaqameedka Beelaha Subeer Awal iyo Garxajis ayaa wargeyska
Foore u sheegay in ay labada dhinac isla qaateen sidii looga wada shaqayn lahaa
in doorashooyinku wakhtigooda ugu qabsoomi lahaayeen gaar ahaan in doorashada
Madaxtooyada wakhtigeeda lagu qabto taasi oo ay labadan dhinac horeba u
shaaciyeen in ay iskula qaateen iyo in meel looga soo wada jeedsado wax kasta
oo carqalad ku keeni kara in doorashada Madaxtooyadu wakhtigeeda dhaafto.
Dhinaca kale xogaha
shalay naga soo gadhay kulankani waxa ay intaasi ku darayaan in Guddida
labaatanka xubnood ka kooban ee shirka laga saaray ay soo dersi doonaan go’aamo
midaysan oo ay ka madax dhaqameed ahaan isla qaataan, kana wada shaqeeyaan
taasi oo la xidhiidha sidii qaddiyadda khilaafka doorashooyinka ee xisbiyada iyo
xukuumadda talada haysa looga ilaalin lahaa in laga dhigo arrimo beelaysan
taasi oo ay sheegeen in ay halis weyn ku tahay wada jirka iyo midnimada beelaha
Somaliland, guddidanina sidoo kale isku soo duwi doonaan talooyin ay ku muujin
karaan aragtidooda la xidhiidha xalka siyaasadeed ee kama dambaysta ah oo ay la
wadaagi doonaan cidda ay khusayso marka ay dhinacooda ka soo dhammaato.
Guddidan labada dhinac iska dhex doorteen shalay ayaa la filayaa in ay maantaba bilaabaan wada hadallo iyo shirar hoose oo ay ku soo saaraan ugu dambayn go’aamo kama dambays ah oo ay madax dhaqameedka labadan beelood ka soo saaraan xaaladda Jamhuuriyadda Somaliland ee siyaasadeed iyo amni.