Masuul iskaga Tagay Shaqadii Uu Kahayay Xukuumada Muuse Biixi
Hargaysa (HWN) Amb Kaysar Cabdilaahi Maxamed oo ka tirsanaa Wasaarada Arimaha Dibada Somaliland ayaa sheegay in uu shaqadii uu kahayay wasaarada uu ka fadhiistay, sida uu ku sheegay qoraalkan hoose oo uubaahiyay
Mahadnaq iyo Nabadgelyayn.
Asalaamu Calaykum
Laga soo bilaabo bishii 7aad ee sanadkii 2018 waxaan ka tirsanaa Wasaarada Arrimaha Dibeda iyo Iskaashiga Caalamiga ah aniga oo ka hawlgalay magaalada Brussels ee Dalka Belgium imikana ka tirsanaa Safaarada aynu ku leenahay Dalkan UK. Waxaa masuuliyadan ka horreysay inaan Wasiir ku Xigeen ka ahaa isla Wasaaradan xilli hore.
Hadaba waxaan jeclaystay inaan idinla wadaago in maanta oo bishan May ay tahay 29 ay u danbaysay shaqadii aan ka hayay Xafiiskeena UK iyo guud ahaan Wasaarada Arrimaha Dibeda Jamhuuriyada Somaliland.
Waxaan u mahadnaqayaa dhamaan Wasiirradii, Wasiir ku xigeenadii, iyo
Agaasimayaashii aanu soo wada shaqaynay, iyo guud ahaan Shaqaalaha Wasaaradda Arrimaha Dibadda ee geesiyaasha ah ee
habeen iyo maalinba u shaqeeya Dalkooda, iyaga oo shaqada ay Qaranka u hayaan
ay tahay mid xasaasi ah oo aan i arkaay i maqlaay ahayn balse in yari ay
ogtahay culayska shaqada ay hayaan.
Waxa aynu sii laban-laabi doonaa dedaalkeenii iyo wax qabadkeenii si kasii balaadhan sidii hore.
Waxaan si gaar ah ugu mahadnaqayaa Wakiilkeena UK Amb Cabdi Cabdilaahi
Xirsi iyo dhamaan Shaqaalaha safaarada ee madaalayaasha ah.
Waad Mahadsan tihiin
Somaliland ha Guulaysto
Amb Kaysar Cabdilaahi Maxamed