Gudoomiyaha Xisbiga KULMIYE Halagu Wareejo Wasiir Saajin Ama Wasiir Koorre
Xisbiga Kulmiye Tusaale ha u noqdo Xisbiyada kale, Guddoomiyenimada Xisbigana haku wareejiyo Wasiir Saajin ama Wasiir Koorre.
Asalaamu Calaykum
Madaxweyne Muuse Biixi Cabdi waxa uu dhawaan ka sheegay Xafladii labaatan Guurada Xisbiga Kulmiye in uu dhawaan wareejin doono xilka Gudoomiyenimo ee Xisbiga Kulmiye, si wanaagsana oo heshiis lagu yahayna uu xilkaas u wareejin doono.
Hadaba Xisbiga Kulmiye oo si weyn u doonaya in ururrada siyaasada la furo, isla markaasna sabab uga dhigaya in aanay jirin siyaasiyiin beelaha darafyada ka soo jeeda oo madax ka ah Xisbiyada Qaranka, ayaa waxaa looga baahan yahay in Xisbigu uu ficil u bedelo rabitaankiisa, oo fursadan Gudoomiyenimo ee banaanaatay uu u cimaamado mid ka mid ah labada masuul ee kala ah Wasiir Maxamuud Sacad Saajin ama Wasiir Saleebaan Cali Koorre oo kasoo jeeda gobolada Sool iyo Awdal.
Si Xisbiga Kulmiye uu
u tuso in Muwaadiniinta reer Somaliland ay u siman yihiin Hoggaaminta Xisbiyada Qaranka, waxaa loo baahan yahay
inuu tusaale u noqdo Xisbiyada kale oo Gudoomiyaha Xisbiga Kulmiye lagu
wareejiyo Wasiir Koorre ama Wasiir
Saajin.
Haddii Xisbigu uu raaco taladan, dadweynaha reer Somaliland si weyn ayay usoo dhawayn doonaan, waxaana meesha ka bixi doonta dooda ah in Xisbiyada Qaranka aanay Hoggaan sare ku lahayn beelaha darafyadu.
Furista iyo Tartanka
Ururrada ka hor ayuu Xisbiga Kulmiye haystaa fursad uu Gudoomiyaha Xisbiga
Kulmiye kaga dhigo Xubin ka soo jeeda Gobolada Bari ama Galbeedka Somaliland,
waa haddii ay inaga dhab tahay inaynu doonayno in Xubno ka soo jeeda beelaha
darafyadu ay Gudoomiye ka noqdaan Xisbiyada Qaranka.
NB: Kaysar ahaan
waxaan aaminsanahay qof kasta oo xilalka sare qabanayaa inuu doorasho xor iyo
xalaal ah ku yimaado, haddiise ay kollayba xulistii aynu isla naqaanay ay
tahay, doorkan aynu u dhiibno Gudoomiyenimada Xisbiga labadan Oday midkood.
Haddii kale oo aynu halkeenii ka miisno oo hebelo gaar ahi ay gacanta isku dhiib-dhiibaan,
markaas Xisbiyada kale kuma sheegi karno inay yihiin Xisbiyo Qabiil.
Mahadsanidin
Kaysar
AFEEF:
Hadhwanaagnews marnaba masuul kama aha Aragtida dadka kale. Qoraaga ayaa xumaanteeda, xushmadeeda iyo xilkeeda sida. waxa kaliya oo Hadhwanaagmedia dhiirigalinaysaa, isdhaafsiga aragtida, canaanta gacaliyo talo wadaagga!