Hargeysa - (HWN)- Xisbiga Mucaaridka ah ee WADDANI ayaa dhagar ku tilmaamay mashruuc dadka danyarta ah ee reer Somaliland qaarkood lagu gaadhsiiyo lacago aad u yar oo la sheegay in uu ka yimid Mashruuc uu dhawr sano ka hor Madaxweynaha Soomaaliya Maxamed Cabdullaahi Farmaajo ka daah Furay magaalada Muqdisho kaasi oo ay maalgaliyo Bangiga adduunku soona mariyo hay’ado safa-fal, si isku mid ahna uga socda maamul Goboleedyada Soomaaliya iyo xataa Somaliland, Mashruucan oo dhinaca Somaliland ay fuliso Wasaaradda Shaqo-galinta, Qoyska iyo Arrimaha Bulshada.

Xoghayaha Arrimaha Bulshada Xisbiga Mucaaridka ah ee WADDANI Mudane Maxamed Siddiiq Dhamme oo daba socda xaaladda mashruucan ayaa waxa uu ku tilmaamay mid sharafta qaranimada la siisanyo qado kooban, sida uu hadalka u dhigay, taasi oo magac dil ku ah dadka reer Somaliland isaga oo sheegay in aanay ka xisbi ahaan garanayn goorta Mashruucan yar dalkeena laga ogolaaday iyada oo xukuumadda Somaliland sannadkii 2020 hore u diidday.

"Baxnaano waa mashruuc dhagar ku ah Qaranimada Somaliland, waxaynu ula baxnay Daryeel $20 ayaa lagu gumaynayaa 32,000 oo Haween ah, Mashruuca waxaynu diidnay 22-kii Bishii April 2020. Goormaa la ogolaaday? Maamul Goboleedyada Soomaaliya ee laga wado Mashruuca maxaynu kaga duwannahay, qado Qaranka yaan la siisan!” sidaa waxa yidhi Xoghayaha Arrimaha Bulshada Xisbiga Mucaaridka ah ee WADDANI Mudane Maxamed Siddiiq Dhamme.

Wasaaradda Arrimaha dibadda & Iskaashiga caalamiga ah ee Somaliland ayaa 22-kii Bishii April waxa ay soo saartay war-saxaadeed ay ku sheegayso in aan mashruucaasi dalka laga ogolayn waxaanu qoraalka ay Wasaaraddu maalintaasi soo saartay u dhignaa sidan: "Dawladda Jamhuuriyadda Somaliland waxa ay ku war galinaysaa Qaramada Midoobay, Midawga Afrika, Midawga Yurub iyo Baanka Adduunka in Barnaamijka Maamulka Muqdisho ula Magac baxay Baxnaano, kuna sheegay in qaybo ka mid ah uu ka fulin doono deegaanno ka tirsan Jamhuuriyadda Somaliland uu yahay faragalin qaawan oo waxyeelo ku ah amniga Somaliland, isla markaana uu yahay Barnaamij lagu marin habaabinayo Bulshada Caalamka. Dawladda Somaliland waxa ay uga digaysaa maamulka Muqdisho isku dayga taagta daran ee uu ku rabo in uu ku fara galiyo qarannimada iyo madax bannaanida Jamhuuriyadda Somaliland, waxayba cod dheer ugu sheegaysaa in uu maamulkiisu ka waantoobo sheegashada caal-waaga ah ee xuduudaha Somaliland.

Dawladda Somaliland waxa ay si gaar ah uga codsanaysaa baanka adduunka in uu ka fiirsado deeqaha la siiyo maamulka aan masuulka ahayn ee ka dhisan Soomaaliya kaas oo caadaystay in uu u adeegsado deeqaha iyo caawimooyinka aadane ee adduunka ujeedooyin gaar ah, kuwo siyaasadeed oo lagu khalkhal galinayo amniga iyo xasiloonida Somaliland.

Ugu dambayn dawladda Somaliland waxa ay si adag uga digaysaa cid kasta oo isku dayda in ay qayb ka noqoto isku dayga fulinta mashruucan ka hor imanaya madax banananida Jamhuuriyadda Somaliland” sidaa ayaa lagu yidhi war-saxaafadeedka hore dawladdu ugu mamnuucday mashruucan balse xisbiga WADDANI sheegay in ay imika waddo Wasaaradda Shaqo-galinta, Qoyska iyo Arrimaha Bulshadu. Waxaana qoraallo xisbigu arrintan kaga hadlayo oo uu Bulshada kula wadaagay Baraha Bulshada ka muuqda Agaasimaha Wasaaradda oo marar hore Boggiisa ku baahiyey kulamo la xidhiidha mashruucan oo uu la qaatay daneeyayaasha mashruucan oo dhinaca Muqdisho looga yaqaano Baxnaano, wasaaradduna ula baxday Daryeel Bulsho.

Isku soo wada duuboo mashruucan ayaa hadal hayn badan ka dhaliyay Baraha Bulshada isaga oo qayb ka ahaa khudbaddii sannadlaha ahayd ee Madaxweyne Muuse Biixi Cabdi oo tirada dadka la siiyay uu Madaxweynuhu qalday, xukuumadduna mar kale dib u baahisay tirada haweenka ka faa’iidaystay iyo xaddiga lacagta oo ay sheegtay in ay dib u saxday, taasi oo faallada ugu badani ka taagan tahay xaddiga aadka u yar ee lacagta ah ee dadka ka soo gaadhaysa mashruucan. Waxa uu Mashruucani ka socdaa magaalooyinka Lughaya, Gabilay, Saylac, Caynaba, Xuddun iyo Taleex. Waxaanay xukuumaddu sheegtay in ay ka faa’iidaysteen illaa imika 32-kun oo qoys oo u dhiganta 200,000 oo qof, bil walbana la siiyo qofkii $20 Doollar.